Qendrat e SHBA-së për Kontrollin dhe Parandalimin e Sëmundjeve (CDC) po vazhdojnë të hetojnë rastet e hepatitit akut me shkaqe të panjohura tek fëmijët dhe publikuan detaje të reja klinike.

Deri më tani, ka pasur të paktën 18 raste të raportuara në të paktën katër shtete në SHBA- dhe dhjetëra të tjera në Evropë.

Detajet e fundit klinike të publikuara nga CDC vijnë nga Alabama, ku u gjetën rastet e para.

Pacientët ishin nga pjesë të ndryshme të shtetit pa asnjë lidhje epidemiologjike. Të gjithë u konsideruan përgjithësisht të shëndetshëm, pa sëmundje të rëndësishme shoqëruese dhe pa dobësi të sistemit imunitar. Mosha mesatare ishte rreth tre vjeç.

Të vjellat dhe diarreja ishin simptomat më të zakonshme në mesin e pacientëve përpara shtrimit, me disa që gjithashtu përjetonin simptoma të rrugëve të sipërme të frymëmarrjes. Shumica kishin një mëlçi të zmadhuar, së bashku me verdhëz dhe sy të verdhë.

Të gjithë pacientët morën rezultate negative të testit për viruset e hepatitit A, B dhe C, dhe disa shkaqe të tjera të hepatitit dhe infeksioneve pediatrike u përjashtuan. Por adenovirusi u zbulua në të gjithë pacientët.

Asnjë prej të prekurve nuk kishte një histori të dokumentuar të infeksionit të mëparshëm të Covid-19.

Tre pacientë patën dështim akut të mëlçisë, dy prej të cilëve iu nënshtruan transplantit të mëlçisë. CDC raporton se të gjithë pacientët janë shëruar, duke përfshirë edhe marrësit e transplantit.

Hepatiti është inflamacion i mëlçisë, një organ jetik që përpunon lëndët ushqyese, filtron gjakun dhe ndihmon në luftimin e infeksioneve. Kur mëlçia është e dëmtuar, funksioni i saj mund të ndikohet.

Më shpesh, hepatiti shkaktohet nga një virus dhe adenoviruset janë një lloj i zakonshëm i virusit që përhapet nga personi në person dhe që mund të shkaktojë një sërë sëmundjesh të lehta deri në më të rënda. Por këto viruse raportohen rrallë si shkaktarë të hepatitit të rëndë te njerëzit e shëndetshëm.

Nuk ka vaksinë për adenoviruset tek fëmijët. Adenoviruset priren të qëndrojnë në sipërfaqe dhe dezinfektuesit me bazë alkooli nuk funksionojnë mirë kundër tyre.