Demokracia.com ka raportuar dje se Policia e Kosovës ka arrestuar, Ilir Abdullahun, bashkëpunëtorin e Enver Sekiraqës, nën dyshime për përfshirje në vrasjen e policit, Triumf Riza.
Shefqet Riza, babai i policit të ndjerë Triumf Riza, e ka vlerësuar pozitivisht arrestimin e Ilir Abdullahut, të njohur si “Liza”.
Babai i policit të ndjerë ka thënë se “Liza” është kryesuesi i, siç tha ai, bandës së Enver Sekiraqës.
“Nuk është vonesë e drejtësisë, sepse ai ka qenë në arrati. Policia e ka bërë punën e tyre, mirë që e ka arrestu. Është një prej kryesorëve të bandës së Enver Sekiraqës, ai është i nxitun, ai ka marrë pjesë… Nuk jemi kontaktuar nga policia, lajmin e kemi marrë nga mediat”, deklaroi ai për Insajderin.
Policia e Kosovës ka njoftuar për arrestimin e Ilir Abdullahut, bashkëpunëtorit të Enver Sekiraqës, të dyshuarit për përfshirje në vrasjen e policit Triumf Riza.
Sipas njoftimit të Policisë së Kosovës, i dyshuari është arrestuar në Batllavë të Podujevës.
“Si rezultat i angazhimeve dhe hetimeve të pandërprera të Policisë së Kosovës, sot me datën 16.07.2023, rreth orës 17:00, në Batllavë të Podujevës është arrestuar i shumë kërkuari (I, A,) i njohur me nofkën “Liza”. I njëjti ishte në kërkim policor për disa vite me radhë, si i dyshuar për vepër penale të vrasjes së rëndë”, thuhet në njoftimin e PK-së.
I dyshuari ka qenë në kërkim nga Interpoli nën akuzat për organizim të vrasjes së policit Riza.
Arben Berisha është dënuar me 35 vite burg për vrasjen e policit.
Incidenti në “Swiss Casino”, kishte ndodhur në dhjetorin e vitit 2006, ndërsa në të ishin të përfshirë Enver Sekiraqa dhe disa shoqërues të tij në njërën anë, dhe i ndjeri Triumf Riza e Arben Selmani në anën tjetër. Në këtë incident i plagosur rëndë kishte mbetur Arben Selmani.
