Komisioni për Vlerësim i Federatës së Futbollit të Kosovës ka marrë vendim t’ia heq kartonin e kuq mesfushorit të Dukagjinit, Bujar Shabanit në takimin kundër Gjilanit.
Shabani u përjashtua me kartonin e dytë të verdhë në minutat shtesë të ndeshjes e ku nuk munguan as reagimet e shumta nga klubi, lojtari dhe njohësit e futbollit, shkruan Demokracia.com.
Komisioni në fjalë ka bërë të ditur se pas shikimit me kujdes të video-incizimit të ndeshjes ka konstatuar se ndëshkimi me kartonin e dytë të verdhë dhe përjashtim nga ndeshja e Bujar Shabanit nuk ka qenë i drejtë.
Kësisoj, Komisioni për Vlerësim ka marrë vendim se lojtarit në fjalë ka të drejtë të aktivizohet në ndeshjen e radhës.
Demokracia kontaktoi sot (e hënë) edhe me ish-gjyqtarin e njohur kosovar, Mustafë Domin i cili u shpreh se në atë rast gjyqtari Kasumi nuk është dashur të akordojë as goditje të lirë, ndërsa për karton as që bëhëj fjalë. /Demokracia.com
