Avokati Tomë Gashi, ka lëshuar një deklaratë e cila ka ngjallur reagime të ashpëra.
Gashi pretendonte se Zorani, një ish milic serb, ka qenë dhëndër i Reçakut – vendit ku Serbia kreu njëren nga masakrat më mizore në Kosovë.
Ndaj këtij reagimi ka reaguar Partia Demokratike e Kosovës – dega në Shtime.
Ata e kanë quajtur shpifje deklaratën e Gashit, duke kërkuar nga ky i fundit të kërkojë falje.
Reagimi i plotë:
REAGIM PUBLIK LIDHUR ME DEKLARATËN E AVOKATIT TOMË GASHI
Partia Demokratike e Kosovës (PDK) në Shtime shpreh shqetësim të thellë lidhur me deklaratën e avokatit Tomë Gashi, e bërë më 27.06.2024, në emisionin televiziv të Dukagjinit “Debat Plus me Ermal Pandurin”. Në këtë deklaratë, z. Gashi ka pohuar se ish-polici serb, Zoran Stanojeviq, “ka qenë dhëndërr i Reçakut”.
Njoftojmë opinionin publik se kjo informatë nuk është e vërtetë. Deklarata e avokatit Gashi është një gënjeshtër dhe për më tepër, ajo lëndon ndjenjat e banorëve të fshatit Reçak, të Shtimes dhe të gjithë Kosovës. Në vend që të mbrojë të drejtat e banorëve të fshatit Reçak dhe familjarëve të viktimave të kësaj masakre, avokati Gashi ka bërë një deklaratë të papërgjegjshme që cenon ndjeshmërinë e tyre.
Kërkojmë nga avokati Tomë Gashi të kërkojë falje publike për këtë deklaratë dashakeqe. Në të kundërtën, do të ndërmarrim veprime ligjore duke e paditur për shpifje dhe fyerje, sipas Ligjit Nr. 02/L-65 Ligji Civil Kundër Shpifjes dhe Fyerjes.
Partia Demokratike e Kosovës (PDK) në Shtime
