Një grup monitorues i zgjedhjeve i ka cilësuar zgjedhjet presidenciale ruse si më të korruptuarat në historinë e saj.

Grupi joqeveritar Golos tha se rezultatet nuk ishin legjitime pasi “fushata u zhvillua në një situatë ku nenet themelore të Kushtetutës ruse, që garantojnë të drejtat dhe liritë politike, në thelb nuk ishin në fuqi”, shkruan Sky News.

“Asnjëherë më parë nuk kemi parë një fushatë presidenciale që ishte aq larg standardeve kushtetuese,” theksoi grupi monitorues.

Sipas mediave ruse, numërimi përfundimtar tregon se Vladimir Putin fitoi 87.28% të votave me një pjesëmarrje rekord prej 77.4%.

Golos deklaroi se vëzhguesit në qendrat e votimit ishin tërhequr pasi votimi filloi në disa rajone, ndërsa në të tjera ata nuk u dërguan në radhë të parë.

“Në biseda private, përfaqësues të kandidatëve dhe partive kanë pranuar se kjo është bërë nën presion”, tha Golos.