Presidenti i Ukrainës, Volodymyr Zelensky, e ka akuzuar Kremlinin se po i drejtohet “terrorizmit energjetik” pasi trupat ruse kanë pak përfitime në fushën e betejës.

Zelensky tha se 4.5 milionë njerëz mbetën pa energji elektrike pas sulmeve ruse në rrjetin e saj energjetik, shkruan BBC.

Në javët e fundit, Rusia ka kryer sulme në shkallë të gjerë me raketa dhe drone në objektet e energjisë ukrainase. Sipas zyrtarëve ukrainas, sulmet vijnë pasi trupat ruse ka të ngjarë të tërhiqen nga qyteti kyç jugor Kherson.

Pasi pësoi një seri humbjesh të dhimbshme në fushën e betejës, Rusia ka shtuar sulmet javët e fundit ndaj infrastrukturës së energjisë elektrike në qytete larg vijave të frontit. Vetëm në muajin e fundit, një e treta e termocentraleve të vendit thuhet se janë shkatërruar, sipas Presidentit Zelensky.

Si rezultat, qeveria ukrainase është detyruar të nxisë popullsinë të përpiqet të përdorë energjinë me kursim.

“Rreth 4.5 milionë konsumatorë janë shkëputur përkohësisht nga konsumi i energjisë”, tha Presidenti Zelensky në fjalimin e tij të natës të enjten