Presidenti ukrainas Volodymyr Zelensky i ka bërë thirrje botës që të parandalojë luftërat e ardhshme duke u siguruar se Rusia është “agresori i fundit”, duke mbyllur një vizitë në Japoni që siguroi sanksione të reja kundër Moskës dhe armë për Kievin.

Në një fjalim që shënon fundin e një turni diplomatik njëjavor që përfshin Evropën, Lindjen e Mesme dhe Azinë, Zelensky tha se fitorja e Ukrainës kundër Rusisë do të pengonte agresorët e ardhshëm, duke e cilësuar planin e tij të paqes prej 10 pikash si “shpëtimi i botës nga lufta”, përcjell Telegrafi.

Plani i Zelensky, i propozuar për herë të parë në nëntor, do të rivendoste kufijtë e Ukrainës dhe do të shihte tërheqjen e forcave ruse nga territori ukrainas, si dhe do të ofronte garanci për sigurinë bërthamore, energjetike dhe ushqimore.

“Ne do të paralizojmë agresorë të tjerë të mundshëm”, tha Zelensky në një konferencë për shtyp të dielën, ditën e fundit të samitit të Grupit të Shtatë (G7) në Hiroshima.

“Kur të gjithë ata që duan luftën e shohin se sa e vendosur është bota kur dëshiron paqen, nuk do të ketë kuptim të fillojnë një luftë”.

Zelensky e bëri adresimin e tij pasi siguroi angazhimet nga vendet e G7 për të rritur presionin ndaj Rusisë dhe për të rritur mbështetjen për mbrojtjen e Ukrainës.

Presidenti i Shteteve të Bashkuara Joe Biden njoftoi më herët një paketë ndihme ushtarake prej 375 milionë dollarësh që përfshin më shumë municion, artileri dhe automjete të blinduara, përveç ofrimit të mbështetjes së tij për trajnimin e pilotëve ukrainas për të fluturuar me aeroplanë luftarakë F-16.

Veç kësaj, të premten, udhëheqësit e G7 u zotuan të forcojnë sanksionet e tyre kundër Rusisë dhe të vazhdojnë të mbështesin Ukrainën për një afat të gjatë.

Uashingtoni vendosi veçmas sanksione të reja ndaj 22 rusë dhe 104 subjekteve ruse, ndërsa kryeministri i Mbretërisë së Bashkuar Rishi Sunak njoftoi një ndalim të importeve të diamanteve, bakrit, aluminit, kallajit dhe nikelit rusë.