Presidenti i Ukrainës Volodymyr Zelensky ka bërë thirrje për zhvillimin e demonstratave në mbarë botën në mbështetje të Ukrainës, ditën që pushtimi i vendit nga Rusia mbushi një muaj.

Presidenti ukrainas i bëri komentet në një fjalim të postuar në Facebook të mërkurën në mbrëmje, me qëllim që demonstratat të fillojnë të enjten.

“M’u thye zemra, zemrat e të gjithë ukrainasve dhe çdo njeriu të lirë në planet. Prandaj ju kërkova që të dilni kundër luftës duke filluar nga 24 marsi, saktësisht një muaj pas pushtimit rus. Nga kjo ditë dhe pas kësaj, tregoni qëndresën tuaj, dilni nga zyrat tuaja, shtëpitë tuaja, shkollat ​​dhe universitetet tuaja, mblidhuni në emër të paqes, dilni me simbolet ukrainase për të mbështetur Ukrainën”, u lut Zelensky.

Zelensky tha se pushtimi rus i Ukrainës është një luftë kundër lirisë dhe se Rusia synon të mposhtë lirinë e të gjithë Evropës dhe botës.

“Për të mbështetur lirinë, për të mbështetur jetën. Mblidhuni në sheshet tuaja, në rrugët tuaja, bëhuni të dukshëm dhe të zëshëm. Thoni se njerëzit kanë rëndësi, se liria ka rëndësi, se paqja ka rëndësi, se Ukraina ka rëndësi,” tha Zelensky.

Zelensky i kërkoi botës të bashkohet kundër pushtimit të Rusisë, duke thënë se “lufta e Rusisë nuk është vetëm luftë kundër Ukrainës, por kuptimi i saj është shumë më i gjerë”.