Presidenti i Ukrainës, Volodymyr Zelensky, ka thënë se mbështet plotësisht idenë e Donald Trumpit për “një armëpushim të plotë dhe pa kushte”, i cili shpreson se do të zgjasë “mjaftueshëm për të siguruar themelin për diplomaci”.

Zelensky përsëriti gjithashtu se do të udhëtojë për në Turqi, ku ka lëshuar një ftesë për bisedime paqeje ballë për ballë me homologun e tij rus, Vladimir Putin.

Dhe Zelensky tha se shpreson që edhe Trump të mund të marrë pjesë, shkruajnë mediat e huaja, përcjell Telegrafi.

“Të gjithë ne në Ukrainë do ta vlerësonim nëse presidenti Trump mund të ishte atje me ne në këtë takim në Turqi. Kjo është ideja e duhur. Mund të ndryshojmë shumë”.

“Shpresoj që rusët të mos i shmangen takimit”, shtoi ai, ndërsa pret një përgjigje zyrtare nga Kremlini.

Vetë Vladimir Putin sugjeroi “bisedime të drejtpërdrejta” me Ukrainën në Stamboll të enjten, por nuk i është përgjigjur ftesës së Zelenskyt.

Trump mbetet optimist se presidentët e Ukrainës dhe Rusisë do të marrin pjesë në bisedimet në Stamboll dhe theksoi se takimi mund të japë “një rezultat të mirë”.

“Mendoj se mund të shohim një rezultat të mirë nga takimi i së enjtes në Turqi midis Rusisë dhe Ukrainës”, tha Trump gjatë një konference për shtyp të hënën.

“Unë besoj se të dy udhëheqësit do të jenë atje”, tha ai, duke shtuar se po shqyrton gjithashtu udhëtimin për në Turqi, por me “kaq shumë takime” në axhendën e tij, ai nuk është i sigurt nëse do të jetë në gjendje të marrë pjesë.

Trump pritet të mbërrijë në Arabinë Saudite të martën dhe prej andej do të udhëtojë për në Katar para se të përfundojë udhëtimin e tij tre-ditor në rajon në Emiratet e Bashkuara Arabe më 15 maj, kur pritet të zhvillohet takimi midis Zelensky dhe Putin.