Samsung Electronics ka publikuar raportin e tij të qëndrueshmërisë për vitin 2024, duke shfaqur strategjitë dhe arritjet e kompanisë në fushat mjedisore, sociale dhe të qeverisjes (ESG).

Bëhet e ditur se raporti thekson përpjekjet e vazhdueshme të kompanisë në menaxhimin e qëndrueshëm, por çfarë do të thotë kjo për përdoruesit e telefonëve dhe pronarët e Galaxy S24 në veçanti?

Raporti i Samsung vë theks të rëndësishëm në përdorimin e materialeve të ricikluara në produktet e saj.

Madje, seria Galaxy S24 në veçanti, përfshin përmbajtje të konsiderueshme të materialeve të riciklueshme, shkruajnë mediat e huaja, përcjell Telegrafi.

Kjo për shkak se Samsung synon të arrijë emetime zero karboni për biznesin e pajisjeve të tij në vitet e ardhshme duke riparuar proceset e tij nga zhvillimi dhe prodhimi te përdorimi dhe riciklimi – diçka që çdo kompani e madhe përpiqet të bëjë.

Kompania po rrit përdorimin e materialeve të ricikluara, duke përfshirë aluminin, xhamin dhe plastika të ndryshme të ricikluara në produktet e saj.

Siç raportohet, seria Galaxy S24 është linja e parë e Samsung që përmban kobalt të ricikluar dhe elemente tokësore të rralla.

Xhami i përparmë dhe i pasmë i telefonit përmban mesatarisht 25 për qind përmbajtje të ricikluar.

Modulet e altoparlantëve të sipërm dhe të poshtëm përmbajnë të paktën 40 për qind çelik të ricikluar, ndërsa Galaxy S24 Ultra përfshin 28 për qind alumin të ricikluar në përbërës të ndryshëm, me modelet S24 dhe S24+ që përmbajnë 30 për qind alumin të ricikluar në dekorimin e kamerës së pasme.

Për më tepër, bateritë në Galaxy S24 Ultra dhe Galaxy S24+ përmbajnë përkatësisht të paktën 50 për qind dhe 10 për qind kobalt të ricikluar, dhe të gjithë magnetët në modulet e altoparlantëve janë bërë me neodymium 100 për qind të ricikluar.