Sipas një raporti, njeriu që zbuloi një sasi dokumentesh të klasifikuara ushtarake amerikane është një entuziast i armëve në të 20-at e tij, i cili punonte në një bazë ushtarake.

Washington Post raporton se burri ndau informacione shumë të ndjeshme – që zbulojnë dobësitë në mbrojtjen e Ukrainës, si dhe numrin e forcave speciale të Mbretërisë së Bashkuar që dyshohet se janë aktive në këtë vend – me një grup prej rreth dy duzina burrash dhe djemsh në platformën online Discord.

Anëtarët e grupit thuhet se i thanë WP se të gjithë kishin një “dashuri reciproke për armët, pajisjet ushtarake dhe Zotin”.

Siç vë në pah Sky News, ai do të dërgonte “transkripta thuajse fjalë për fjalë” të dokumenteve të klasifikuara që ai tregoi se i kishte sjellë në shtëpi nga puna e tij në një “bazë ushtarake” – dhe më vonë postoi fotografi të artikujve, raporton gazeta.

Megjithatë, Sky News thekson se nuk mund të verifikojë në mënyrë të pavarur detajet në raport.

Ndryshe, kujton Sky News, Discord tha në fillim të kësaj jave se po bashkëpunon me një hetim mbi rrjedhjen masive të informacionit shumë të klasifikuar.

Publikimi i dokumenteve ka shkaktuar tronditje në qeverinë amerikane dhe jo vetëm.