Ish-kryetari i Vetëvendosjes, Visar Ymeri, ka folur mbrëmë në Debat Plus për situatën aktuale politike në vend, duke thënë se një format i shpejtë i dialogut do të ishte me i dobishëm.

Më tej, ai ka folur për moszbatimin e Marrëveshjes së Ohrit, duke thënë se ajo është pranuar nga kryeministri Kurti dhe nëse ka pasoja atëherë duhet të “jesh i gatshëm për to”.

“Kur na si Kosovë kemi filluar me kuptu që këta ndërmjetës nuk janë të paanshëm. Një vegim të tillë, një hapje të shpejtë të dritares për ta parë procesin nga brenda na e kanë thënë presidentja dhe kryeministri në nëntorin e viti të kaluar. Edhe marrëveshjen në Bruksel edhe aneksin në Ohër e kemi pranuar. Te zbatimi kemi ngecur. Pse reagimi ndaj Kosovës është kaq i madh? Reagimi është shumë më i shtuar nga SHBA-të sesa nga BE-ja. Sikur Kurti t’i kishte thënë jo planit franko-gjerman dhe krejt çka ka ndodhur rreth tij në fillim, o njohje o hiç, kishim marrë ndëshkime por do të ishin të tjetër lloji.”

“Tash kemi investuar krejt Bashkësinë Ndërkombëtare në një marrëveshje më të gjitha zotimet e veta dhe në fund u kemi thënë jo, qysh tash jo, nuk mundesh tash jo. Kjo sjellje që i ka sjellë Kosovës këto qortime e po përgatitet edhe masa apo pasoja politike. Çka po do të na thotë Bashkësia Ndërkombëtare është kështu, ju po thoni se jeni vend sovran dhe i merrni vendimet në mënyrë sovrane, por vendimet e juaja sikur vend sovran kanë pasoja, duhet të jesh i gatshëm edhe për to, kur të ndodhë pasoja mos më thirr mu.” – ka thënë Ymeri në Debat Plus.

Tutje, ai ka theksuar se “sa më i vogël të jetë koordinimi me ndërkombëtarët, aq më të mëdha janë pasojat.”