Presidenti i Serbisë, Aleksandar Vuçiq, dje i ka dhënë fund zgjerimit mediatik, gjatë së cilës ka dhënë edhe një intervistë për CNN, me një mysafir tradicional në emisionin “Cirilica” me prezantuesin e tij të preferuar Milomir Mariq.

Gjatë intervistës të cilën media boshnjake Slobodna Bosna se quan monolog gati dy orësh, Vuçiq përsëriti frazat e njohura me të cilat arsyetoi aktin terrorist në veri të Kosovës dhe ia hodhi të gjithë fajin Prishtinës dhe kryeministrit të Kosovës, Albin Kurti.

Prezantuesi Mariq vuri në dukje se deri në të shtënat në Banjskë Kurti ishte nën sanksione ndërkombëtare dhe në një lloj izolimi, prandaj nuk u ftua të merrte pjesë në Asamblenë e Përgjithshme të Kombeve të Bashkuara në Nju Jork.

Për këtë Vuçiq tha:

“Por për këtë ishte në Nju Jork presidentja Vjosa Osmani. Ajo është edhe më e keqe se Kurti kur është fjala për qëndrimin e saj ndaj serbëve dhe Serbisë. Kurti i tërheq të gjitha fijet, por Osmani është më e rrezikshme se ai”, tha Vuçiq.