Presidenti i Serbisë, Aleksandar Vuçiq, i ka quajtur gënjeshtarë të gjithë që përkrahin dhe kanë mundësuar organizimin e zgjedhjeve për të dielën në katër komunat e veriut në Kosovë.
Sipas tij, të dielën në veri “do të shënohet ditë e tmerrshme për demokracinë dhe ditë e vështirë për popullin serb”.
“Do të jetë ditë ku turpi i Evropës dhe i botës do të regjistrohet për atë që po bëjnë”, ka thënë ai të enjten në TV Prva.
“Jemi duke marrë pjesë në zgjedhje qe 10 vjet, dhe ju ende s’e keni formuar Asociacionin për 10 vjet. Tani vijmë në këtë, do të jem i drejtpërdrejtë, është turp për QUINT-in. Do t’i mbajnë zgjedhjet dhe ata do t’i pranojnë ato”, ka thënë ai tutje, sipas “Danasit”.
“Ka kandidatë të Albin Kurtit dhe Hashim Thaçit, që do t’i marrin katër për qind të votave. Turp për të gjithë, për të gjithë QUINT-in, janë të gjithë gënjeshtarë”, ka shtuar ai kur është pyetur për mungesën e kandidatëve serbë.
