Gazetari i njohur pakistanez, Arshad Sharif, është qëlluar për vdekje të dielën nga policia në Kenia.

Ai mbeti i plagosur rëndë teksa ishte pasagjer në një automjet në lëvizje, sipas një deklarate të policisë dhe nuk arriti t’iu mbijetonte plagëve, raporton abcnews.al.

Sharif ishte një kritik i ushtrisë pakistaneze, si dhe një mbështetës i zëshëm i kryeministrit të rrëzuar Imran Khan.

49-vjeçari ishte larguar nga Pakistani në gusht pasi u ankua për ngacmim.

Mbikëqyrësi i policisë së Kenias, Autoriteti i Pavarur i Mbikëqyrjes së Policisë (Ipoa), tha se kishte dërguar ekipin e tij të reagimit të shpejtë në vendin e të shtënave në qarkun Kajiado pranë kryeqytetit, Nairobi.

Një hetim ka nisur në Kenia pasi të hënën gazetarët në qytetin pakistanez të Karaçit mbajtën një protestë në rrugë për vrasjen e tij.

Ekipi do të hetojë “vrasjen e dyshuar policore të një shtetasi pakistanez”, u tha gazetarëve kryetarja e Ipoas, Ann Makori.

Kryeministri i Pakistanit Shehbaz Sharif shkroi në Twitter se ishte “thellësisht i pikëlluar nga lajmi tronditës i vdekjes tragjike të gazetarit Arshad Sharif”.

Në një mesazh të shkurtër në Twitter, gruaja e Sharifit, Javeria Siddique tha se ajo kishte humbur një “mik, bashkëshort dhe gazetarin e saj të preferuar”.

Duke bërë thirrje për një “hetim të duhur gjyqësor”, ish-kryeministri Khan tha se ishte “i tronditur” nga ajo që ai e përshkroi si “vrasje”, duke shtuar se ai “pagoi çmimin përfundimtar për të thënë të vërtetën”.

Khan u hoq nga pushteti në prill pasi humbi një votë mosbesimi. Sharif, i cili kishte mbështetur zotin Khan, më pas filloi të ankohej se Agjencia Federale e Hetimit të vendit po e ngacmonte atë dhe ai u largua nga vendi