Dy personat e dyshuar për vrasjen e rreshterit të Policisë së Kosovës, Muhamed Lika, vazhdojnë të jenë në arrati.

Hetuesit policorë po punojnë intensivisht për identifikimin dhe arrestimin e tyre, por deri mëngjesin e sotëm një gjë e tillë nuk ka ndodhur, transmeton indeksonline.

Kryeprokurori i Prokurorisë Themelore në Ferizaj, Burim Çerkini, deklaroi se dy të dyshuarit kanë vepruar me kapela dhe pas kryerjes së vrasjes janë larguar në këmbë drejt një destinacioni të panjohur.

“Ngjarja ka ndodhur në momentin kur rreshteri po kthehej nga puna. Në shkallët e ndërtesës ku banonte, ai është qëlluar nga persona ende të paidentifikuar dhe ka ndërruar jetë si pasojë e plagëve vdekjeprurëse. Nga provat e siguruara deri më tani, akti është kryer nga dy persona, të cilët më pas janë larguar nga vendi i ngjarjes në këmbë. Policia ka ndërmarrë të gjitha veprimet e nevojshme hetimore në bashkëpunim me Prokurorinë Themelore në Ferizaj”, tha Çerkini.

Sipas tij, hetimet janë duke u zhvilluar me një intensitet të lartë për të zbuluar autorët e ngjarjes. Në vendin e krimit janë gjetur katër gëzhoja të kalibrit 9.19 mm, por jo edhe arma e përdorur nga autorët. Megjithatë, në vendin e ngjarjes është gjetur arma e viktimës, e cila nuk është shkrepur.

Dëshmitë dhe motivi ende të paqarta

Prokuroria ka intervistuar disa dëshmitarë dhe persona të pranishëm në momentin e ngjarjes, por ende nuk është përcaktuar motivi i vrasjes. Kryeprokurori Çerkini theksoi se nuk ka indikacione që rreshteri Muhamed Lika të ketë pasur ndonjë problem gjatë ushtrimit të detyrës ose ndonjë konflikt personal që mund të lidhej me këtë akt kriminal.

“Nga provat që kemi mbledhur deri më tani, dy personat e dyshuar janë larguar në këmbë nga vendi i ngjarjes. Nuk kemi të dhëna që ata kanë përdorur ndonjë automjet për t’u larguar më vonë. Viktima njihej si një zyrtar policor me profesionalizëm të lartë dhe nuk kemi ndonjë informacion që të sugjerojë se ai ka pasur ndonjë problem që mund të shpjegonte motivin e kësaj vrasjeje. Për momentin, ende nuk dihet arsyeja e këtij krimi”, shtoi ai.

Dëshmitë e deritanishme tregojnë se autorët nuk kanë përdorur maska, por vetëm kapela, ndërsa fakti që ngjarja ka ndodhur gjatë natës ka vështirësuar identifikimin e tyre.

Vrasja nuk lidhet me grabitje

Çerkini hodhi poshtë mundësinë që vrasja të ketë qenë rezultat i një grabitjeje. “Me siguri të madhe mund të themi se nuk ka të bëjë me ndonjë grabitje. Rreshteri po kthehej nga puna rreth orës 23:00 dhe po shkonte në banesën e tij. Provat e deritanishme nuk sugjerojnë që autorët kanë pasur ndonjë qëllim tjetër përveç kryerjes së vrasjes”, tha ai.

Prokurori theksoi se ende nuk mund të konfirmohet nëse vrasja ka qenë e organizuar apo e paramenduar, por fakti që në të kanë marrë pjesë dy persona mund të sugjerojë një planifikim paraprak.

Një incident i mëparshëm

Kryeprokurori zbuloi se në vitin 2021, rreshterit Muhamed Lika i ishte djegur lokali, por deri më tani nuk ka ndonjë lidhje të konfirmuar mes këtij incidenti dhe vrasjes së tij.

Ndërkohë, prokurori i çështjes, Ismet Rrahmani, bëri të ditur se viktima është goditur me një plumb fatal. “Viktima ka marrë vetëm një goditje plumbi, e cila ka qenë tejshpuese. Ai nuk kishte jelek antiplumb dhe në momentin e sulmit ishte jashtë detyrës”, tha ai.

Rrahmani theksoi se vendi i ngjarjes ndodhet në një zonë banimi dhe nuk ka institucione mikrofinanciare që mund të ishin shënjestër e ndonjë grabitjeje. Ai u bëri thirrje qytetarëve që të bashkëpunojnë me autoritetet për të ndihmuar në zbardhjen e rastit.

Hetimet po vazhdojnë, ndërsa policia dhe prokuroria mbeten të angazhuara për të identifikuar dhe kapur autorët e vrasjes së rreshterit Muhamed Lika.