Gazetari Kreshnik Gashi ka ngritur një sërë pyetjesh mbi veprimet e institucioneve pas vrasjes së një zyrtari policor mbrëmjen e së martës në Kaçanik. Në një reagim në Facebook, Gashi pyeti për mosmbajtjen e një konference për media pas rastit tragjik.

Ndër çështjet e ngritura nga Gashi është edhe mungesa e një shpërblimi të shpallur nga Policia apo Ministria e Punëve të Brendshme për informacione që mund të çojnë në identifikimin e autorëve.

Gashi gjithashtu pyeti se pse ende nuk është publikuar një përshkrim fizik i dyshuarve dhe pse nuk është krijuar një linjë e veçantë për ndarjen e informacioneve me qytetarët.

Reagimi i plotë:

Pyetjet e para 24 orë pas vrasjes së policit:

Pse policia nuk ka mbajtur një konferencë për mediat pas vrasjes, ku do të sqaronte rrethanat e ngjarjes?

Pse ende nuk është shpallur shpërblimi nga policia apo Ministria e Punëve të Brendshme për çdo informacion që mund të çojë në identifikimin e autorëve?

Pse policia nuk ka publikuar një përshkrim fizik të dyshuarve në lidhje me ngjarjen?

Pse nuk ka një linjë të destinuar për ndarjen e informacioneve? Pse pse pse edhe shume pse.

Pa marrë parasysh motivet, vrasja duhet të zbardhet sa më shpejt dhe autorët të dërgohen në burg.