Presidenti i Serbisë, Aleksandar Vuçiq, po çuditet pse po i kërkohet direkt njohja e pavarësisë së Kosovës si kusht për ecjen tutje të vendit të tij drejt Bashkimit Evropian.

Ai tha se e ka ditur këtë, por nuk ia ka përmendur askush në takime zyrtare, transmeton Demokracia.com.

“Këtë e kemi vënë re, por në procesin zyrtar të negociatave në tavolinë ende është tema ‘normalizim i plotë i marrëdhënieve’ dhe askund nuk flitet për njohje reciproke”, u shpreh Vuçiq sot pas miratimit të raportit në Parlamentin Evropian ku kërkohet njohja reciproke Kosovë-Serbi.

Duke komentuar raportin përfundimtar për Serbinë në Komisionin për Punë të Jashtme të Parlamentit Evropian, ku kërkohet që marrëveshja finale Kosovë – Serbi të ketë njohjen reciproke në thelb, Vuçiq pohoi se këtë ia ka thënë edhe kancelari gjerman Olaf Scholz para pak ditësh.

“Do të jetë interesant 23 qershor në Bruksel, kur duhet të merret një vendim për Ukrainën. Për herë të parë askush i gjallë në këtë tokë nuk e di se çfarë do të ndodhë”, tha Vuçiq.

Më 23 qershor, në Bruksel do të mblidhen liderët e shteteve të BE-së. /Demokracia.com/