Zyrtarët perëndimorë dhe amerikanë besojnë se Vladimir Putin mund t’i shpallë shumë shpejt luftë Ukrainës edhe zyrtarisht, një vendim që do t’i hapte rrugë mobilizimit të plotë të rezervistëve të ushtrisë ruse.

Sipas CNN, vendimi mund të merret më 9 maj, në ditën që Rusia feston “Ditën e Fitores”, ose mposhtjen e nazistëve në vitin 1945, që i dha fund Luftës II Botërore.

Zyrtarët perëndimore besojnë prej kohësh tashmë se Putin do të përdorë simbolikën e asaj dite si propagandë, për të shpalosur sukseset ushtarake në Ukrainë, përshkallëzimin e konfliktit, ose të dyja bashkë.

Deri më sot, Putin e ka quajtur pushtimin e Ukrainës një “operacion special ushtarak”, duke shmangur termat “pushtim” apo “luftë”.

Me shpalljen e luftës zyrtarisht, Putin do të mund të mobilizojë forcat rezerviste, që sipas zyrtarëve perëndimore janë të nevojshme për shkak të humbjeve që ka pësuar Rusia në Ukrainë.

Kievi thotë se ka vrarë rreth 23 mijë ushtarë rusë, ndërsa agjencitë perëndimore vlerësojnë se kjo shifër është të paktën 10 mijë.

Rusia do të përpiqet të aneksojë gjithashtu Luhanskun dhe Donjeckun në mes të muajit maj, tha të hënën ambasadori i SHBA në OSBE, Michael Carpenter.

Ka gjithashtu të dhëna se Rusia po planifikon të aneksojë qytetin juglindor të Khersonit.

“Raportet thonë se Rusia planifikon të projektojë referendume pas anëtarësimit diku nga mesi i majit”, shtoi Carpenter.

Pseudo referendumet janë diçka për të cilën presidenti Zelenskij ka paralajmëruar prej kohësh.

Pak pas pushtimit, presidenti Vladimir Putin njoftoi se njeh pavarësinë e dy rajoneve separatiste pro-ruse.