Ambasadori i ri amerikan në Serbi, Christopher Hill, ka arritur të enjten rreth orës 14:00 në Beograd ku pritet të fillojë detyrën e re.

Hill pritet që sot t’i dorëzojë letrat kredenciale presidentit serb, Aleksandar Vuçiq, përcjell Demokracia.com.

Me të mbërritur në aeroportin “Nikola Tesla”, ambasadori Hill theksoi se ishte i lumtur që kishte mbërritur dhe se për këtë po përgatitej prej kohësh.

“Ishte një fluturim i gjatë, Julie dhe ne jemi shumë të lumtur që kemi arritur në Serbi. Ne kemi qenë duke u përgatitur për këtë me muaj, nuk kam qenë këtu për një kohë të gjatë,” tha Hill.

Më 15 tetor, presidenti i SHBA-së, Joseph Biden, emëroi Hillin si ambasador të ri në Serbi. Hill bëri betimin dy javë më parë dhe filloi përgatitjet për të ardhur në Beograd.

Hill zëvendëson Anthony Godfrey si ambasador në Serbi, përcjell Demokracia.com.

Ambasadori i ri i SHBA-së ishte i dërguari special i SHBA-së për Kosovën dhe luajti një rol kyç në negociatat që çuan në konferencën e Rambujesë të vitit 1999 dhe çlirimin e Kosovës. Hill konsiderohet mik i madh i Kosovës.

Krahas Beogradit, Hill ishte në detyrë edhe në Shkup dhe Tiranë. Ai shërbeu si ambasador në Korenë e Jugut, Irak dhe Poloni. /Demokracia.com/