Ushtria ukrainase u bëri thirrje nënave të ushtarëve rusë të kapur në territorin ukrainas që të shkojnë t’i marrin bijtë e tyre, duke deklaruar se dhjetëra ushtarë janë kapur që nga fillimi i pushtimit rus të vendit.

“Është marrë një vendim për t’i dorëzuar ushtarët rusë të kapur nënave të tyre nëse ata vijnë në Ukrainë për t’i marrë, në Kiev”, tha Ministria e Mbrojtjes e Ukrainës në një deklaratë, transmeton Demokracia.com.

Janë publikuar numrat e telefonit dhe adresat e postës elektronike përmes të cilave nënat mund të marrin informacion për djemtë e tyre të burgosur në Ukrainë.

Nëse konfirmohet se djali i tyre është kapur, nënat ruse ftohen të vijnë në Poloni dhe më pas të hyjnë në Ukrainë nga Polonia.

“Do të mirëpriteni dhe do të dërgoheni në Kiev, ku do të dorëzohen djemtë tuaj”, tha ministria ukrainase, duke shtuar se ndryshe nga fashistët e Putinit, ata nuk po bëjnë luftë kundër nënave dhe fëmijëve të tyre të kapur.

Al Jazeera kujton se gjatë konfliktit midis Moskës dhe separatistëve çeçenë në vitet 1990 dhe 2000, nënat shkuan në vendngjarje për të marrë djemtë e tyre të kapur ose trupat e djemve të tyre të vdekur. Shumë rekrutë të rinj rusë u dërguan në front dhe disa u kapën.

Ukraina pretendon se ka kapur qindra ushtarë rusë dhe videot e ushtarëve të rinj që flasin me familjet e tyre po qarkullojnë në mediat sociale. Disa edhe qajnë.

“Ne kemi mbetur këtu si derra”

Agjencitë e huaja raportojnë se disa incizime janë bërë ndoshta nën presion, por ato janë dëshmi e fuqishme, goditëse për Rusinë.

Në njërën prej tyre ushtari thotë se komandanti nuk pranoi t’i tregonte se ku po shkonin: “Nuk e dija që do të shkonim në Ukrainë, u mashtrova”, transmeton Demokracia.com.

“Ne u mashtruam dhe u përdorëm si mburojë njerëzore”, thotë një tjetër.

“Ne vepruam si nazistët. Ne sulmuam njerëzit këtu, kështu që ata u detyruan të mbronin territorin e tyre,” shtoi i treti.

“Gjithçka që ata na thonë është një ëndërr… Unë thjesht nuk e kuptoj pse na u treguan të gjitha ato ëndrra në Rusi,” thotë një ushtar në një video tjetër ndërsa ai flet me familjen e tij. “Ne kemi mbetur këtu si derra,” shton ai. /Demokracia.com/