Drejtuesit e Agjencisë Kosovare të Privatizimit kanë pasur sot mysafirë nga Beogradi.
Një veturë Dacia me targa të Beogradit është parë në zyrat e AKP-së, derisa targat i kishte të mbuluara me ‘stickers’. Mësohet se personat që kanë ardhur me këtë veturë janë takuar me Bordin e AKP-së.
Demokracia.com ka siguruar fotografi dhe video nga oborri i AKP-së ku vetura me targa të kryeqytetit serb, e ka të vendosur “stickersin” me të cilin e ka mbuluar flamurin serb.
Më 30 shtator të vitit të shkuar me ndërmjetësimin e BE-së, Kosova dhe Serbia arritën një marrëveshje të përkohshme të targave. Pas skadimit të saj palët ndonëse nuk arritën marrëveshje të përhershme të targave, e vazhduan marrëveshjen e 30 shtatorit.
Marrëveshja e përkohshme pasoi vendimin e 20 shtatorit të Qeverisë së Kosovës që vendosi masën e reciprocitetit për çështjen e targave serbe.
Me këtë masë çdo automjet i Serbisë që hynte në territorin e Kosovës duhet të merrte targa provuese.
Ideja ishte që këto targa provuese të ishin të vlefshme për 60 ditë dhe të kushtonin pesë euro. Edhe qytetarët e Kosovës të cilët kishin targa RKS përgjatë 10 viteve të shkuara kur hynin në territorin e Serbisë, paguanin rreth pesë euro për targat provuese, që vlenin për 60 ditë.
Masa e reciprocitetit e vendosur nga Qeveria e Kosovës për targat nxiti protesta dhe bllokada të rrugëve nga serbët e veriut, të cilët shtatorin e kaluar bllokuan rrugët që çonin në dy pikëkalimet kufitare që lidhin Kosovën dhe Serbinë, Jarinjë dhe Bërnjak./ Demokracia.com/