Një burrë 31-vjeçar vdiq pasi u infektua me një baktere mishngrënëse teksa po notonte në Gjirin e Meksikës. I ndjeri kishte një tatuazh të sapo bërë në këmbën e tij të djathtë dhe injoroi këshillën për të pritur të paktën dy javë përpara se të dilte për të notuar në oqean.

Siç raportohet në British Medical Journal Case Reports, burri ishte i infektuar me Vibrio vulnificus, një patogjen i rrezikshëm që është i pranishëm në shumë mjedise detare, si grykëderdhjet dhe zonat bregdetare. Ajo lidhet me kolerën dhe plagët e infektuara nga bakteri kanë një shkallë vdekshmërie prej rreth 25 për qind.

Pas notit, burri pati ethe dhe të dridhura. Një skuqje filloi të formohej rreth tatuazhit të tij dhe simptomat u përkeqësuan në dy ditët në vijim, duke rezultuar në dërgimin e tij me urgjencë në spital. Në kohën kur ai ishte nën kujdesin mjekësor, këmba e tij ishte bërë vjollcë. Këmba e djathtë, ku ishte tatuazhi, mori shpejt plagë të thella për shkak të infeksionit.

Ekzaminuesit mjekësorë dyshuan se V. vulnificus ishte shkaku i menjëhershëm, por brenda 24 orëve nga pranimi i tij, burri ishte në ndihmë jetësore duke luftuar me shokun septik. Sistemi i tij imunitar ishte shkatërruar nga infeksioni dhe organet e tij po luftonin për të funksionuar. Edhe pse gjendja e burrit u përmirësua pas disa javësh, dëmtimet në trupin e tij ishin aq të rënda sa ai ndërroi jetë pas dy muajsh në terapi intensive.

Punimi hulumtues thekson se si shkaku rëndues për pacientin ishte sëmundja kronike e mëlçisë për shkak të viteve të pirjes së rëndë të alkoolit. Ata raportojnë se dëmtimi i rëndë i mëlçisë mund të rrisë shkallën e vdekshmërisë për V. vulnificus dhe profesionistët mjekësorë duhet të jenë të vetëdijshëm për këtë faktor kur trajtojnë pacientët. Kjo mund të ndihmojë pacientët edhe pse nuk është një garanci.

“Fatkeqësisht edhe nëse jemi në gjendje të identifikojmë se mëlçia është e sëmurë, nuk ka terapi shtesë përtej antibiotikëve, kujdesit për plagët dhe kujdesit mbështetës”, tha autori kryesor Dr Nicholas Hedren për IFLscience. “Edhe pavarësisht antibiotikëve të duhur dhe kujdesit mbështetës, për fat të keq, infeksioni është shumë serioz dhe shumë pacientë ende vdesin pasi infeksioni pushton trupin”.