Fizioterapisti i Kombëtares së Shqipërisë, Ylli Mihali ka vdekur mëngjesin e sotëm.
Mihali nuk arriti të fitonte betejën me COVID-19 e cila ia mori edhe jetën, njoftojnë mediat shqiptare, shkruan Demokracia.com.
Ai ishte për dy javë në gjendje të rënduar për shkak të infektimit me koronavirus.
Mihali shërbeu për 27 vite te kombëtareja “kuqezi”, ndërsa për vdekjen e tij ka reaguar edhe i pari i Federatës Shqiptare të Futbollit, Armand Duka.
Reagimi i Dukës:
Të dashur miq,
Pak minuta më parë u njoha me lajmin e kobshëm se Ylli Mihali, njeriu i mirë, fjalëpak, u nda nga jeta pas një betejë të gjatë e stërmunduese me Covid-19.
Ky është një moment i vështirë për të gjithë futbollin shqiptar, që e njofti dhe e dashuroi aq shumë Yllin, që emrin e reflektonte në ҫdo hap dhe moment të jetës së tij. Një fizioterapist dhe një njeri i jashtëzakonshëm që shërbeu për 27 vite pranë ekipit tonë Kombëtar, pranë klubit të tij Tiranës, pranë sportistëve në vështirësi, duke qënë pranë tyre në ҫdo situatë.
Humori, dashuria për njerzit, dhembshuria e Yllit do të na mungojnë. Në këtë moment të vështirë për familjen e tij, miqtë e tij të shumtë, lutemi që shpirti i tij të prehet në paqe.
Lamtumirë Yll, do të të kujtojmë gjithmonë me dashuri! /Demokracia.com