Inflacioni vjetor i energjisë në BE arriti në 27% në janar 2022, duke vazhduar trendin rritës. Ky informacion vjen nga të dhënat e publikuara së fundmi nga Eurostat.

Pas normës së tij më të ulët në pesë vjet në maj 2020 (-11%), inflacioni i energjisë filloi të rritet, por vazhdoi të tregojë norma negative deri në shkurt 2021, duke variuar midis -9% dhe -1%. Nga marsi 2021, inflacioni i energjisë ka qenë pozitiv dhe është rritur pothuajse vazhdimisht, duke arritur në 26% në nëntor 2021 dhe 27% në janar 2022.

Norma e inflacionit për energjinë është më e larta që kur Indeksi i Harmonizuar i Çmimeve të Konsumit (IHÇK) u publikua për herë të parë në vitin 1997. Në tetor 2021, ai kaloi pikën më të lartë të regjistruar deri më tani: 17% në korrik 2008.

Duke parë nënkomponentët e energjisë, gazi arriti pikën më të lartë në janar 2022 me pothuajse 41%, një rritje prej 13,5 pikë përqindjeje (pp) krahasuar me muajin e kaluar, dukshëm mbi burimet e tjera të energjisë – karburantin (përfshirë benzinën, naftën, karburantet dhe lëndët djegëse të tjera) në +26% (-2,8 pp) dhe energjia elektrike në +24% (+3,1 pp), shkruan Scan.

Gjatë pandemisë COVID-19, normat e inflacionit për karburantin ishin më të paqëndrueshme sesa për energjinë elektrike dhe gazin. Normat e inflacionit për gazin dhe energjinë elektrike goditën vlera negative midis prillit dhe dhjetorit 2020, por ishin më të qëndrueshme, mesatarisht -5% për gazin dhe -1% për energjinë elektrike. Karburanti megjithatë arriti një pikë të ulët në maj 2020 (-21%) dhe më pas arriti kulmin në +37% në nëntor 2021.

Ndër vendet anëtare të BE-së, Belgjika (67%) dhe Holanda (58%) regjistruan normat më të larta të inflacionit të energjisë në janar 2022, e ndjekur nga Lituania (43%), Estonia (41%) dhe Greqia (40%). Nga ana tjetër, norma e inflacionit të energjisë ishte 0% në Maltë, me Kroacinë dhe Portugalinë pas, të dyja me 12%.