Përkundër kritikave që ka marrë nga Departamenti Amerikan i Shtetit për lirinë e mediave, Albin Kurti dhe zyrtarë të qeverisë së tij edhe sot kanë vazhduar sulmet ndaj fjalës së lirë.
Sot Kurti u mundua tu tregojë gazetarëve se si ta bëjnë punën e tyre, shkruan Demokracia.com.
Ai i ka porositur gazetarët që mos t’i vendosin deklaratat e prononcimet politike, mbi tekstin e marrëveshjes bazë apo aneksit.
“Vetëm një moment, lexojeni tekstin. Deklaratat politike të kujdo qoftë, janë për t’i shërbyer procesit. Nuk keni nevojë të vendosni asnjë deklaratë, apo prononcim publik ,politik të askujt mbi tekstin e marrëveshjes bazë, apo aneksit. Fjala urgjencë është te çështja e të pagjeturve.” , tha ai.
E, një tjetër zyrtar i qeverisë së tij, u treguar tepër brutal ndaj mediave. Demokracia.com ka publikuar sot një fotografi të Sharr Jakupit, shef i kabinetit të ministres së Punëve të Jashtme dhe Diasporës, Donika Gërvalla në një klub striptizi. Në një postim në Facebook, ai ato i ka quajtur “këlyshë të klanit Pronto”, që sipas tij po përhapin lajme të rreme.
Ai thotë se fotografia në fjalë është realizuar në një klub nate gjatë pushimeve private në Tajlandë dhe jo në një klub striptizi.
Ndryshe, Departamenti Amerikan i Shtetit ka publikuar këtë muaj raportin për Kosovën për vitin 2021 dhe ndër të tjera është shkruar edhe për lirinë e medias në Kosovë.
Sipas raportit të DASH-it, ndonëse thotë se nuk ka pasur raportime për censurë të drejtpërdrejt të mediave të shkruara ose elektronike, përmendin ankesat e gazetarëve se politikanët dhe grupet e organizuara kriminale shpesh rezultojnë në autocensurë.
“Nuk kishte raportime për censurë të drejtpërdrejtë të mediave të shkruara ose elektronike, megjithëse gazetarët pretenduan se presioni nga politikanët dhe grupet e organizuara kriminale shpesh rezultonte në autocensurë. Rastet e sulmeve kibernetike ndaj mediave online janë rritur. Disa gazetarë u përmbajtën nga raportimi kritik investigativ për shkak të frikës për sigurinë e tyre fizike ose sigurinë e punës. Gazetarët herë pas here merrnin oferta për përfitime financiare në këmbim të raportimit pozitiv ose braktisjes së një hetimi”, thuhet në raport.
“Sipas Shoqatës së Gazetarëve, zyrtarë qeveritarë si dhe kriminelë të dyshuar kërcënuan verbalisht gazetarët për raportim negativ të përceptuar. Sipas disa redaktorëve, agjencitë qeveritarë dhe korporatat tërhoqën reklamat nga gazetat që publikonin materiale kritike ndaj tyre”, thotë më tutje raporti.
Në këtë raport, gjithashtu përmendet se si gazetarët janë ankuar se pronarët dhe menaxherët e mediave i pengonin ata të publikonin apo transmetonin storje kritike ndaj qeverisë, partive politike apo edhe zyrtarëve të caktuar, madje thuhet se ata u kërcënuan edhe me largim nga puna.
“Gazetarët u ankuan se pronarët dhe menaxherët e mediave i pengonin ata të publikonin apo transmetonin storje kritike ndaj qeverisë, partive politike apo zyrtarëve të veçantë. Në disa raste, pronarët e mediave thuhet se kërcënuan se do t’i pushonin nga puna gazetarët nëse ata prodhonin raportime kritike. Gazetarët u ankuan gjithashtu se pronarët e mediave i penguan ata të raportonin për korrupsionin e nivelit të lartë të qeverisë”, thuhet në këtë raport.
Raporti përmend edhe mungesën e transparencës nga institucionet qeveritare, me theks të veçantë Ministrinë e Punëve të Jashtme të Diasporës.
“Deri në tetor, Institucioni i Avokatit të Popullit, ishte duke hetuar 12 ankesa nga mediat, organizatat e shoqërisë civile dhe qytetarët lidhur me shkeljet e supozuara të së drejtës për qasje në dokumente publike, kryesisht nga Ministria e Punëve të Jashtme dhe Diasporës. Institucioni i Ombudspersonit arriti në përfundim se institucioneve publike u mungonte kapaciteti profesional dhe personeli për t’iu përgjigjur kërkesave për qasje në dokumente publike, gjë që çoi në vonesa të konsiderueshme ose dështime në ofrimin e arsyetimit ligjor për refuzimin ose kufizimin e qasjes”, shkruan DASH-i.
Raporti thotë se disa media kanë miratuar politika editoriale dhe transmetim të pavarur nga interesat politike dhe të biznesit. Aty thuhet se financimi ishte pjesërisht i kufizuar sepse qeveria hezitonte në blerjen e reklamave në mediat që publikonin materiale kritike ndaj politikave të Qeverisë.
