Ushtria ruse nuk do ta pushtojë kurrë Kievin, tha sot kryeministri slloven, Janez Jansha.

Ai e tha këtë duke folur për përshtypjet e tij gjatë qëndrimit në kryeqytetin e Ukrainës, të cilin e vizitoi të martën së bashku me kryeministrat polakë dhe çekë, kur bisedoi edhe me lidershipin ukrainas, transmeton Demokracia.com.

Duke folur për televizionin slloven, Jansha tha se ishte një vizitë inkurajuese për liderët ukrainas, transmeton Hina.

“Pikësëpari, ajo vizitë ishte një tregues se ne nuk ia kemi kthyer shpinën Ukrainës”, theksoi Jansha, duke shtuar se diplomatë të shumtë, përfaqësues të organizatave ndërkombëtare dhe korporatave u tërhoqën nga kryeqyteti ukrainas edhe para sulmit të Rusisë ndaj Ukrainës.

“Për ta ishte një shenjë se nuk janë harruar, se nuk bëhej fjalë vetëm për mbështetje nga larg, por se dikush besonte se do të mbroheshin dhe do të fitonin”, shtoi Jansha.

Sipas tij, sulmet në qendër të Kievit janë relativisht të rralla dhe qyteti nuk është i rrethuar.

“Kiev po sulmohet nga lindja dhe perëndimi, por forcat që sulmojnë qytetin janë shumë të dobëta për ta pushtuar atë. Ushtria ruse nuk do ta pushtojë kurrë Kievin”, theksoi kryeministri slloven.

Ai përsëriti idenë e tij për vendosjen e një zone ndalim-fluturimi mbi Ukrainë për të lehtësuar mbrojtjen kundër agresionit rus, megjithëse aleanca e NATO-s e hodhi poshtë idenë, duke pretenduar se kjo do të çonte në një konflikt të hapur me Rusinë.

Jansha, megjithatë, pohon se ideja tashmë është mbështetur nga tre vende anëtare të NATO-s dhe se është i bindur se mbështetja për propozimin do të rritet. /Demokracia.com/