Mercenarët rusë të armatosur rëndë u tërhoqën nga qyteti jugor rus i Rostovit brenda natës në bazë të një marrëveshjeje që zbuti një sfidë të paprecedentë ndaj autoritetit të Vladimir Putin dhe ndaloi përparimin e tyre të shpejtë drejt Moskës.

Luftëtarët e grupit Wagner u kthyen në bazat e tyre në këmbim të garancive për siguri dhe udhëheqësi, Yevgeny Prigozhin, do të zhvendoset në Bjellorusi, sipas marrëveshjes së ndërmjetësuar nga presidenti bjellorus Alexander Lukashenko.

Megjithatë, rebelimi i ndërprerë ngre pyetje të mëdha në lidhje me kontrollin e Putinit në një vend që ai e ka sunduar me dorë të hekurt për më shumë se dy dekada.

Ministri i Jashtëm i Italisë tha se kishte shkatërruar “mitin” e unitetit rus.

Putin nuk ka bërë komente publike që kur u arrit marrëveshja për të de-përshkallëzuar krizën, shkruan AP.

Televizioni shtetëror publikoi të dielën pjesë të një interviste në të cilën Putin tha se ai i jepte përparësi kryesore konfliktit në Ukrainë dhe ishte në kontakt të vazhdueshëm me ministrinë e mbrojtjes. Megjithatë, intervista dukej se ishte regjistruar para rebelimit dhe ai nuk i referohej ngjarjeve të së shtunës.

Televizioni shtetëror tha gjithashtu se Putin do të marrë pjesë në një takim të Këshillit të Sigurimit të Rusisë këtë javë që vjen, pa dhënë detaje.