Në vitet e fundit, ka pasur gjithnjë e më shumë kërkesa për rishikimin dhe përfundimin e pranisë së Misionit të Administratës së Përkohshme të Kombeve të Bashkuara në Kosovë (UNMIK).

Shtetet e Bashkuara të Amerikës dhe institucionet e Kosovës kanë shprehur qëndrimin e tyre se ky mision ka humbur relevancën në rrethanat aktuale politike dhe shoqërore në vend.

Përfaqësuesi i SHBA-së në Këshillin e Sigurimit të OKB-së, John Kelley, tha se 81 për qind e buxhetit të UNMIK-ut shpenzohet për paga të stafit, ndërkohë që misioni nuk ka më ndonjë funksion të vërtetë në Kosovë dhe nuk kontribuon në paqe.

“UNMIK është një mision paqeruajtës pa paqeruajtës, me një mandat të tejkaluar prej kohësh. SHBA u bën thirrje anëtarëve të tjerë të Këshillit që të rishqyrtojnë mandatin e UNMIK-ut dhe të fillojnë një mbyllje të rregullt të operacioneve të tij. Koha për këtë tranzicion ka kaluar,” deklaroi Kelley.

Po ashtu edhe Këshilltari për media i Presidencës, Bekim Kupina, tha se kjo ka qenë kërkesë e kahershme e presidentes Vjosa Osmani.

“Kjo ka qenë edhe kërkesë e kahershme e Presidentes Osmani, e përsëritur në adresimet që i ka bërë në Këshillin e Sigurimit” tha Kupina.

Edhe Ministrja në detyrë e Punëve të Jashtme të Kosovës, Donika Gërvalla, në fjalimin e saj në Këshillin e Sigurimit të OKB-së ka kërkuar gjithashtu  largimin e UNMIK-ut nga Kosova.

Sipas tyre, UNMIK-u jo vetëm që nuk luan më një rol të domosdoshëm në ruajtjen e paqes apo ndihmesës institucionale, por përbën edhe një barrë të panevojshme financiare.

Argumentet për mbylljen e këtij misioni lidhen kryesisht me mungesën e funksionit të tij konkret, shpenzimet e mëdha administrative dhe, sipas autoriteteve kosovare, shtrembërimin e realitetit në raportimet zyrtare.

Kjo çështje po ngjall debat të gjerë në arenën ndërkombëtare, ndërsa gjithnjë e me shumë po ngrihet pyetja nëse ka ardhur koha për të mbyllur një kapitull të gjatë të ndërhyrjes ndërkombëtare përmes UNMIK në Kosovë.

Misioni i Administratës së Përkohshme të Kombeve të Bashkuara në Kosovë (UNMIK) për FrontOnline ka folur pas kërkesave për mbylljen e tij.

Në një përgjigjie zyrtare, UNMIK thekson se mandati i tij rrjedh nga Rezoluta 1244 e Këshillit të Sigurimit të OKB-së.

“Rishikimi i mandatit, duke përfshirë një mbyllje të mundshme të misionit, është vetëm në diskrecionin e Këshillit të Sigurimit” thuhet në përgjigjien e UNMIK

Kjo përgjigje vjen pas kërkesave të përsëritura nga përfaqësues të SHBA-së dhe autoriteteve të Kosovës për mbylljen e misionit, duke e cilësuar atë si të tejkaluar dhe joefikas në rrethanat aktuale.

Po ashtu UNMIK thotë se  Rezoluta 1244 (1999) e Këshillit të Sigurimit të Kombeve të Bashkuara përcakton mandatin e pranisë civile ndërkombëtare në Kosovë, si dhe praninë e sigurisë (KFOR).

‘’Rezoluta 1244 (1999) e Këshillit të Sigurimit të Kombeve të Bashkuara përcakton mandatin e pranisë civile ndërkombëtare në Kosovë, si dhe praninë e sigurisë (KFOR)’’ tha UNMIK për FrontOnline.