SHBA-të i kanë tërhequr vëmendjen kryeministrit izraelit, Benjamin Netanyahu që të mos ndërmarrë veprime kundër Iranit, gjë që do të rrezikonte negociatat mbi programin bërthamor të Teheranit.

“I thashë se nuk mendoj se do të ishte momenti i mirë tani, sepse jemi shumë afër një zgjidhjeje për programin bërthamor”, tha Donald Trump gjatë një bisede me gazetarët, duke iu referuar telefonatës së tij të fundit me kryeministrin izraelit.

Presidenti amerikan siguroi se bisedimet me Teheranin janë “shumë të mira”. Dy vendet sapo kanë përfunduar një raund të pestë negociatash në Romë, pa arritur një marrëveshje. Ata kanë konfirmuar se janë gati të vazhdojnë dialogun.