I dërguari Special i Bashkimit Evropian për dialogun Kosovë-Serbi, Miroslav Lajçak do të presë të sot në takim kryenegociatorët e Kosovës dhe Serbisë, Besnik Bislimi dhe Petar Petkoviq.

Takimi do të mbahet në Bruksel, ndërsa fokusi do të jetë te zbatimi i plotë i marrëveshjes së 27 shkurtit e arritur mes palëve për normalizimin e marrëdhënieve, si dhe hapat drejt qetësimit të situatës në veri të Kosovës, shkruan Demokracia.com.

Kështu ka bërë të ditur zëdhënësi i BE-së, Peter Stano përmes një postimi në llogarinë e tij në Twitter.

“Emisari Miroslav Lajçak do të presë kryenegociatorët e të dyja palëve në kuadër të dialogut të lehtësuar në Bruksel. Fokusimi te zbatimit të plotë të Marrëveshjes së 27 Shkurtit dhe hapat drejt de-eskalimit të situatës në veri të Kosovës”, ka shkruar Stano.

Pjesëmarrja e Bislimit është konfirmuar nga qeveria e Kosovës.

“Mund të konfirmoj nga ana jonë, zëvendëskryeministri Bislimi nesër do të jetë në Bruksel”, kanë thënë për Telegrafin këshilltari i tij politik, Klisman Kadiu.

Takimi ndërmjet dy kryenegociatorëve në Bruksel është hapi i katërt i rënë dakord mes Kosovës dhe Bashkimit Evropian për shtensionimin e situatës në veri të Kosovës.

Takimi i së mërkurën pason pajtimin e arritur më 10 korrik ndërmjet Bashkimit Evropian dhe Kosovës për shtensionimin e situatës në komunat veriore të banuara me shumicë serbe.

Qeveria e Kosovës tashmë ka ulur për 25 për qind praninë e forcave policore në ndërtesat komunale dhe është pajtuar të mbështesë mbajtjen e zgjedhjeve të reja në veri.

“Prej javës së kaluar e kemi zvogëluar prezencën e Policisë së Kosovës për 25 për qind në tri ndërtesat komunale në veri. Tani kemi nisur t’ua hapim rrugëve zgjedhjeve të parakohshme. Kosova është duke e zbatuar marrëveshjen e arritur me BE-në, në Bratisllavë, për shtensionimin e situatës”, shkroi të martën në rrjetet sociale, kryeministri i Kosovës, Albin Kurti.

Tensionet u rritën në fund të muajit maj kur kryetarët shqiptarë të komunave veriore të Kosovës, morën detyrën me mbështetjen e policisë pas zgjedhjeve lokale të muajit prill të cilat u bojkotuan nga serbët.

Diplomacia perëndimore që atëherë ka kërkuar uljen e tensioneve përmes pezullimit të operacioneve policore në veri, zhvendosjes së kryetarëve të komunave në zyra alternative dhe shpalljes së zgjedhjeve të parakohshme me pjesëmarrje të pakusht të serbëve të Kosovës.

Takimi i nesërm mund të shënojë një periudhë të re zhvillimesh për të ulur tensionet që u përshkuan me veprime të dhunshme dhe nxitën shqetësime për ripërtëritje konfliktesh në zonën e trazuar të Kosovës. /Demokracia.com/