Të paktën 14 njerëz janë vrarë, përfshirë gjashtë fëmijë, si pasojë e një sulmi raketor rus në një zonë banimi në qytetin qendror të Ukrainës, Krivi Rih, të premten, njoftoi presidenti i Ukrainës, Volodymyr Zelensky.

Ky është njëri prej sulmeve më vdekjeprurëse të Rusisë në Ukrainë këtë vit.

Sulmi në qytetin e lindjes së Zelenskyt, i cili ndodhi në një kohë kur preisdenti amerikan Donald Trump po përpiqet t’i japë fund luftës, dëmtoi ndërtesat e banimit dhe shkaktoi zjarr, tha guvernatori rajonal Serhiy Lysak, në Telegram.

Trupat e të vdekurve dhe të plagosurit mund të shiheshin të shtrirë në trotuare në video të paverifikuara që po qarkullonin në Telegram.

Të paktën 50 njerëz u plagosën në këtë sulm, thanë shërbimet e emergjencës, duke shtuar se numri mund të rritet. Më shumë se 30 prej tyre, përfshirë një foshnjë tre muajsh, janë dërguar në spital, tha Lysak.

Zelensky tha se operacionet për shpëtim janë duke vazhduar dhe u bëri thirrje vendeve perëndimore të ushtrojnë më shumë trysni ndaj Moskës.

“E gjithë bota e sheh këtë. Çdo raketë, çdo dron dëshmon se Rusia kërkon vetëm luftë”, shkroi ai në Telegram.

Shtetet e Bashkuara thanë javën e kaluar se ishin pajtuar me Rusinë dhe Ukrainën për ndaljen e sulmeve ndaj infrastrukturës energjetike të njëra-tjetrës.

Megjithtatë, të dyja palët e kanë akuzuar njëra-tjetrën për shkelje të marrëveshjes.

Kievi thotë se kishte rënë dakord më parë me një propozim të SHBA-së për një armëpushim të plotë dhe të pakushtëzuar prej 30 ditësh, por Rusia e kishte refuzuar një hap të tillë në bisedime të veçanta me zyrtarët amerikanë.

“Duhet t’i japim fund këtij terrori, t’i mbrojmë njerëzit dhe ta detyrojmë Rusinë drejt paqes”, tha ministri i Jashtëm ukrainas, Andrii Sybiha.

Forcat ruse e përdorën një raketë balistike për sulmin, tha Avokati i Popullit, Dmytro Lubinets.

Armë të tilla arrijnë shënjestrën brenda minutash dhe është e vështirë t’i rrëzosh, nëse nuk ke mbrojtje ajrore më të avancuar.

Rusia e mohon se synon civilët, por mijëra civilë janë vrarë dhe plagosur që nga fillimi i pushtimit të Ukrainës në vitin 2022.