Dy ishuj të largët dhe të pabanueshëm në Antarktidë, të populluar vetëm nga pinguinë dhe foka, janë përfshirë në listën e tarifave të vendosura nga administrata e presidentit amerikan Donald Trump.
Ishujt Heard dhe McDonald, territor australian i vendosur rreth 4 mijë kilometra në jugperëndim të Australisë, janë të arritshëm vetëm përmes udhëtimit shtatëditor me varkë nga qyteti Perth. Këta ishuj janë të pabanueshëm dhe të vizituar rrallë – vizita e fundit e dokumentuar nga njerëzit daton në vitin 2016, nga një grup radioamatorësh.
Megjithatë, SHBA-ja vendosi tarifë importi prej 10% për këta ishuj, krahas disa territoreve të tjera të Australisë si Ishujt Cocos (Keeling), Ishulli i Krishtlindjes dhe Ishulli Norfolk, ky i fundit me një tarifë edhe më të lartë prej 29%. Po ashtu, tarifat prekën edhe territore të tjera të largëta si arkipelagu norvegjez Svalbard, Ishujt Falkland dhe Territori Britanik i Oqeanit Indian.
Ministri australian i Tregtisë, Don Farrell, e quajti vendimin “qartësisht një gabim”, duke shtuar me ironi: “Pinguinët e gjorë nuk e di çfarë i bënë Trumpit… kjo tregon se ishte proces i nxituar.”
Kryeministri australian Anthony Albanese shtoi se situata ilustron faktin se “askush në Tokë nuk është i sigurt nga tarifat arbitrare”.
Ekspertët kanë ngritur dyshime mbi të dhënat që çuan në këto tarifa. Mike Coffin, studiues nga Universiteti i Tasmanisë, ka thënë për BBC-në se nuk ka ndonjë aktivitet tregtar të rëndësishëm nga ishujt Heard dhe McDonald dhe se atje “nuk ka asgjë”.
Megjithatë, të dhënat e Bankës Botërore tregojnë se në vitin 2022, SHBA-ja importoi rreth 1.4 milionë dollarë nga territori – shumica të përshkruara si “makineri dhe pajisje elektrike”. Sipas një raporti të “The Guardian”, ka indikacione se këto produkte janë etiketuar gabimisht si të ardhura nga Heard dhe McDonald, ndërkohë që origjina e tyre reale mund të jetë krejt tjetër.
Ishujt Heard dhe McDonald janë të njohur për natyrën e paprekur dhe unike. Të listuar si Trashëgimi Botërore nga UNESCO, ato përbëjnë një nga shembujt e rrallë të ekosistemeve të pastra nga ndikimi njerëzor, ku jetojnë qindra mijëra pinguinë dhe gjenden formacione aktive vullkanike, si vullkani Big Ben.
