Kryeministri i Shqipërisë Edi Rama ka reaguar pas takimeve që ka zhvilluar për dy ditë me radhë me autoritetet më të larta të Bashkimit Evropian në Bruksel. Teksa thekson se takimet ishin një lajm i mirë lidhur me progresin e Shqipërisë në negociatat me Bashkimin Europian, nga ana tjetër Rama e cilëson brengosës konstatimin e regresit të marrëdhënieve të Republikës së Kosovës me bashkësinë euro-atlantike. Sipas kreut të qeverisë shqiptare aleatët nuk e konceptojnë që Kosova refuzon të hedhë hapa konkretë për qetësimin e situatës me Serbinë.
“Takimet me autoritetet më të larta të Bashkimit Europian ishin një lajm shumë i mirë lidhur me progresin e Shqipërisë në negociatat me Bashkimin Europian dhe politikën tonë konstruktive rajonale. Por fatkeqësisht në këto takime, ishte tejet brengosës konstatimi i regresit të marrëdhënieve të Republikës së Kosovës me bashkësinë euro-atlantike. BE-ja e mbështetur nga SHBA ka vënë në Tryezën e Dialogut mes Serbisë dhe Kosovës, planin më të mirë të mundshëm të normalizimit, i cili paqton më në fund Ballkanin Perëndimor, duke i hapur rrugë edhe njohjes së plotë ndërkombëtare të Kosovës!
Është e pakonceptueshme për aleatët tanë strategjikë, që Kosova vazhdon refuzon të hedhë qoftë edhe një hap të vetëm konkret e konstruktiv për de-eskalimin e situatës gjithnjë e më të rrezikshme në Veriun e Republikës së Kosovës. Kësisoj Beogradi po ia del të fshihet pas mjegullës gjithnjë e më të dendur, që qasja e pashpjegueshme strategjike e Prishtinës po krijon mes Kosovës dhe bashkësisë euroatlantike, sidomos pas lirimit pa kushte nga Serbia të tre policëve të mbajtur fare padrejtësisht, me ditë të tëra, në kushtet e heqjes së lirisë”, shkruan Rama.
Ai shpreh bindjen se zgjidhje duhet të jetë një konference pa afat kohor, ku të mbyllur brenda mureve të një strukture mikpritëse nën kujdesin e bashkësisë euro-atlantike, liderët e Kosovës dhe Serbisë duhet të përmbyllin pikat e marrëveshjes së normalizimit.
“Është koha për një konferencë të nivelit më të lartë, të thirrur nga Franca e Gjermania, me mbështetjen e Bashkimit Evropian dhe Shteteve të Bashkuara, ku të dyja palët të mos ngrihen nga tryeza e dialogut, deri në nënshkrimin e një marrëveshjes së plotë të normalizimit, përfshirë natyrisht edhe dakordësimin për Asociacionin e Komunave me Shumicë Serbe brenda kornizës kushtetuese të Republikës së Kosovës.
Shqipëria ka qenë, është dhe do të mbetet vendosmërisht një forcë që promovon paqen, mbron stabilitetin në rajon, kontribuon për bashkëpunimin rajonal dhe punon pa u lodhur për rritjen e saj të gjithanshme, pa rënë asnjëherë në kurthin ballkanik të së shkuarës, po edhe pa heshtur në asnjë rast përballë shfaqjeve kërcënuese të vetëmjaftueshmërisë sovraniste, nga kushdoqoftë, kurdoqoftë e kudoqoftë, në lagjen tonë të vogël në mes të Europës“, shton ai.
Pas takimit të djeshëm me Presidentin e Këshillit të Europës Charles Michel, Rama ka takuar këtë të Martë personazhet kryesore të familjes evropiane. Fillimisht, kreu i qeverisë zhvilloi takim me Presidenten e KE-së Ursula Von der Leyen. Më pas u takua edhe me Komisionerin për Zgjerimin Evropian Olivér Várhelyi dhe përfaqësuesin e Lartë të Bashkimit Evropian Josep Borrell.
