Sulmet ajrore turke në veri të Sirisë kërcënojnë sigurinë e personelit ushtarak të Shteteve të Bashkuara dhe situata e përshkallëzuar po rrezikon përparimin e viteve kundër luftëtarëve të ISIS-it, ka thënë Pentagoni.

Komentet publike përfaqësojnë dënimin më të fortë nga SHBA-të për operacionet ajrore të Turqisë aleate të NATO-s në ditët e fundit kundër forcave të udhëhequra nga kurdët YPG (Njësitë e Mbrojtjes së Popullit) në veri të Sirisë.

“Sulmet e fundit ajrore në Siri kërcënuan drejtpërdrejt sigurinë e personelit amerikan që po punon në Siri me partnerët lokalë për të mposhtur ISIS-in dhe për të mbajtur paraburgimin e më shumë se 10 mijë të burgosurve të ISIS-it”, tha zëdhënësi i Pentagonit, Pat Ryder.

Ryder tha se situata e përshkallëzuar kërcënoi përparimin e bërë në luftën kundër luftëtarëve të ISIS-it në rajon.

Ai shtoi se SHBA i njeh “shqetësimet legjitime të sigurisë” të Turqisë.

Komentet nga zyrtari amerikan vijnë pasi Rusia gjithashtu paralajmëroi kundër një operacioni tokësor turk në Siri.

SHBA ka afërsisht 900 ushtarë në Siri, kryesisht në verilindje të vendit, të cilët punojnë me Forcat Demokratike Siriane (SDF), të cilat udhëhiqen nga YPG, për të luftuar kundër mbetjeve të ISIS-it.

Presidenti turk Rexhep Tajip Erdogan tha të mërkurën se operacionet ajrore të Turqisë ishin vetëm fillimi dhe se do të fillonte një operacion tokësor kur të ishte e përshtatshme pas një përshkallëzimi në sulmet hakmarrëse.

Ankaraja nisi operacionet ajrore në fundjavë si hakmarrje për një sulm me bombë në Stamboll një javë më parë që vrau gjashtë persona dhe për të cilin fajësoi Partinë e Punëtorëve të Kurdistanit (PKK) dhe YPG. Askush nuk e ka marrë përgjegjësinë dhe PKK dhe YPG kanë mohuar përfshirjen.

Turqia ka nisur më parë inkursione ushtarake në Siri kundër YPG-së, duke e konsideruar atë si një krah të PKK-së së jashtëligjshme, të cilën Turqia, SHBA dhe Bashkimi Evropian e konsiderojnë si një grup terrorist.

PKK dhe YPG ndajnë lidhje të ngushta ideologjike, shkruan AlJazeera, transmeton Klankosova.tv.

Kjo nuk është hera e parë që operacionet e Turqisë në veri të Sirisë kërcënojnë personelin amerikan. Në vitin 2019, trupat amerikane në zonë u vunë nën zjarr artilerie nga pozicionet turke teksa Turqia zhvilloi një ofensivë kundër luftëtarëve kurdë, aleatë të SHBA-së në atë kohë.

Turqia i është ankuar vazhdimisht SHBA-së se mbështetja për SDF-në e udhëhequr nga YPG minon pozicionin e Uashingtonit ndaj PKK-së dhe angazhimin e tyre ndaj sigurisë së Turqisë.