Portieri i Ballkanit, Stivi Frashëri është rikthyer në stërvitje me skuadrën pas incidentit në Gjilan.
“Gardiani” shqiptar u sulmua fizikisht nga dy tifozë gjatë minutës së fundit të ndeshjes derbin kundër Gjilanit me tifozët e këtyre të fundit që hyrën në fushë për të festuar golin e minutës së 94-të dhe me ç’rast sulmuan atë, shkruan Demokracia.com.
Frashëri u dërgua me urgjencë në spitalin e Gjilanit, për t’u liruar në orët e mbrëmjes të po asaj dite.
E tani rreth dy javë më pas ai i është rikthyer stërvitjeve me “portokallezinjtë” për takimin me Prishtinën në fundjavë.
Ballkani ka publikuar pamjet e stërvitjes së Frashërit në stadiumin e qytetit në Suharekë.
Kujtojmë se për sulmin ndaj Frashërit dy persona po mbahen në paraburgim.
Ballkani e fitoi atë takim me rezultat zyrtar 0:3, kurse Gjilani u dënua me tri ndeshje mos lojë në stadiumin e qytetit në Gjilan dhe pa prezencën e tifozëve. /Demokracia.com/