Është liruar me kusht edhe një tjetër person i dyshuar për sulm ndaj gazetarëve në pjesën veriore të Kosovës. Çka thoshte për të ministri Xhelal Sveçla?

Lajmi për lirimin e të dyshuarit Urosh Vukashinoviq u dha nga avokati i tij, Nebojsha Vllajiq për Kossev.

“Po, U.V. do të lirohet me kusht sot. Aktualisht jemi duke i zgjidhur dokumentet lidhur me këtë gjë dhe ai do të lirohet gjatë ditës”, është shprehur Vllajiq.

Por, qysh ishte shprehur për të Xhelal Sveçla?

Në një postim të bërë me qasje triumfale në profilin e tij në Facebook, Sveçla e cilësonte haptas si kriminel edhe Vukashinoviqin.

“I arrestuari i tretë, i radhës, është Urosh Vukasinoviq. Këta kriminelë, të cilët po marrin urdhra për këto sulme nga Beogradi, tashmë do të përballen me drejtësinë.” – është shprehur z. Sveçla përmes një postimi më 19 qershor në Facebook.

Më herët me kusht janë liruar edhe dy qytetarë tjerë serbë të dyshuar për të njëjtën vepër.

Kujtojmë se më datën 10 korrik, kryenegociatori i Kosovës Besnik Bislimi kishte bërë marrëveshje për hapat e parë drejt de-eskalimit të situatës në Bratisllavë me emisarin Mirosllav Llajçak.

Ai sot është në Bruksel ku do të zhvillojë një tjetër takim me Llajçakun, siç është edhe kryenegociatori serb Petar Petkoviq.

Ministri Sveçla megjithëse ka bërë reagim pas arrestimit të personave të dyshuar, ai megjithatë nuk ka reaguar pas lirimit të tyre. Nuk ka reaguar as deri tash pas lajmit për Vukashinoviqin.

Sulmi i 16 qershorit në Leposaviq

16 qershori kishte qenë një nga ditët më të tensionuara në veri të Kosovës pas protestave të dhunshme të 26 dhe 29 majit.

Atë ditë ishin sulmuar gazetarët e disa ekipeve mediale në Kosovë.

Në lidhje me këtë sulm disa prej gazetarëve kishin raportuar edhe para deputetëve në Komisionin për Media. Njëri prej tyre, z. Pleurat Salihu, madje edhe kishte qarë duke rrëfyer se si ishin sulmuar.