Sipas sondazheve të fundit të opinionit publik para zgjedhjeve në Turqi, të cilat do të mbahen më 14 maj, kundërshtari kryesor i Rexhep Tajip Erdogan për postin e presidentit, Kemal Kiliçdaroglu, ka mbështetjen e mbi 50 për qind të të anketuarve.

Sondazhet, të kryera që nga tërmeti shkatërrues i 6 shkurtit, tregojnë se Kiliçdaroglu, si përfaqësues i pjesës më të madhe të opozitës turke, kryeson në raundin e parë të votimit, raporton Reuters, transmeton Demokracia.com.

Sipas raporteve, 50,9 për qind e të anketuarve kanë votuar për të në sondazhet e 7 majit dhe 45,4 për qind për Erdoganin.

Në një zgjedhje që konsiderohet si një nga më të rëndësishmet në historinë moderne të Turqisë, presidenti aktual Erdogan përballet me sfidën më të madhe politike gjatë qeverisjes së tij dy dekadash.

Nëse asnjë kandidat nuk merr më shumë se gjysmën e votave në raundin e parë, dy kandidatët më të mirë do të përballen më 28 maj.

Shumica e sondazheve për zgjedhjet parlamentare tregojnë aleancën kryesore të opozitës, Aleancën Kombëtare, përpara Aleancës Popullore, të udhëhequr nga AK Partia e Erdoganit.

Koalicioni parazgjedhor i opozitës përfshin opozitën kryesore CHP të Kiliçdaroglu, më pas Partinë Islamiste Felicity, Partinë Demokratike, si dhe dy parti të themeluara nga ish-aleatët e Erdoganit – Deva dhe Ardhmëria.

Partia e tretë më e madhe në parlament, Partia Popullore Demokratike (HDP) pro-kurde, formoi Aleancën e Punës dhe Lirisë me disa parti të tjera të krahut të majtë.

Opsionet politike, të cilat shkojnë në votime, mund të hyjnë në parlament nëse kalojnë pragun prej shtatë për qind të numrit të përgjithshëm të votave. /Demokracia.com/