Në një intervistë në podcastin “The Rest is Politics” me gazetarët Rory dhe Alastair, kryeministri i Kosovës Albin Kurti u thellua në qasjen e tij në të bërit politikë, duke pranuar raste kur ai mund të ketë tejkaluar kufijtë me këmbënguljen dhe insistimet e tij. Duke trajtuar shqetësimet e ngritura nga kritikët, veçanërisht në lidhje me tensionet e fundit me aleatët si Shtetet e Bashkuara dhe vendet evropiane, Kurti pranoi se këmbëngulja e tij ndonjëherë çoi në tensione.

Gjatë intervistës, Kurti u përball me pyetje rreth qasjes së tij rreth çështjeve të fundit, veçanërisht në lidhje me dinarin. Ai pranoi se kritikat, edhe nga aleatët si Shtetet e Bashkuara dhe Bashkimi Evropian, janë thelbësore për përparimin.

“Së pari, nuk më shqetësojnë kritikat”, tha Kurti. “Jam intelektualisht një fëmijë i teorisë kritike nga, le të themi, Zhan Zhak Ruso në Shkollën e Frankfurtit. Pra, kritika është e shëndetshme. Besoj se nuk ka përparim pa kritikë.”

“Ne mund të mos pajtohemi, por Bashkimi Evropian, Shtetet e Bashkuara të Amerikës dhe Britania e Madhe janë aleatët, miqtë dhe partnerët tanë”, pohoi Kurti më tej.

“Mendoj se është mjaft e guximshme ta quash Sekretarin amerikan të Shtetit “naiv” kur po flisnit për gjëra që ai po përpiqet të bëjë. Duket se jeni qëllimisht shumë pa kompromis. Ju nuk shqetësoheni vërtet nëse këto fuqi më të mëdha po ju vijnë dhe thonë se po e përkeqësoni këtë. Do të na mbarojë durimi?”, ishte një tjetër pyetje drejtuar Kurtit në kontekst të tensioneve mes qeverisë së Kosovës dhe aleatëve të saj.

Duke iu përgjigjur pyetjes për qëndrimin e tij në dukje pa kompromis, Kurti pranoi: “I gjithë aktivizmi im politik është karakterizuar nga idealizmi në një nivel dhe në një nivel tjetër nga insistimi dhe këmbëngulja aq sa kam mundur të bëj me aftësitë dhe njohuritë e mia. Shprehja e këtyre ndonjëherë ishte pak e tepërt. Ndonjëherë e teproja me insistimin dhe këmbënguljen time.”

Duke theksuar në një farë mënyre nevojën për vetë-reflektim, Kurti u ‘ankua’ për fokusin e tepruar në dokumentimin e mendimeve të tij dhe jo në përvojat e tij.

“Ndoshta një nga të metat e mia në këtë aktivizëm politik ka qenë se kam mbajtur një ditar të të menduarit tim më shumë sesa të përvojës sime, dhe nëse do të kisha mbajtur një ditar të përvojës sime, ndoshta do të mund të bëja më mirë dhe më shumë për të tjerët dhe duke përmirësuar veten time.” – tha ai