Ministri letonez i Punëve të Jashtme, Krisjanis Karins, ka deklaruar se s’ka konsensus brenda ministrave të Këshillit të Evropës për anëtarësimin e Kosovës në këtë institucion.

Ai është shprehur në Sesionin e Asamblesë Parlamentare të Këshillit të Evropës ku ishin prezentë edhe deputetë të Kuvendin të Kosovës, se Letonia e përkrah anetarësimin e Kosovës, por sipas tij, duhet ende “të kemi përshtypje të ngjashme” nga shtetet e tjera anëtare.

“Në lidhje me sulmet terroriste, të 24 shtatorit 2023, realiteti është që në tavolinën e ministrave të Këshillit të Evropës nuk ka konsensus. Po ashtu akoma nuk ka konsensus në lidhje me anëtarësimin e Kosovës në Këshillin e Evropës. Çështja e kësaj Asambleje është opinioni duhet t’i paraqitet Këshillit, meqë ne në Këshill të Ministrave, në lidhje me shumë çështje, përfshirë edhe këtë, operojmë mbi baza konsensuale”, ka deklaruar ai.

Për sulmet serbe në veriun e Kosovës, i pyetur nga deputeti i Aleancës për Ardhmërinë e Kosovës (AAK), Besnik Tahiri, Karins është shprehur se nëse vërtetohet se ka pasur përfshirje nga jashtë, kjo do ta bëjë “edhe më shqetësuese situatën”.

“ Siç e dimë të gjithë ne, Latvia ka qenë lidere në kërkimin e së vërtetës në këto institucione, dhe siç e dimë të gjithë, me 24 shtator, të 2023, Kosova ka qenë nën sulm terrorist nga grupe të uniformuara paramilitare të përkrahura nga Serbia.

Shumë institucione, përfshirë ato të BE-së dhe SHBA-ve, kanë reaguar, andaj cili do të jetë qëndrimi i Këshillit të Evropës, kur do të reagoj ky institucion? Dhe çfarë mendoni për hetimin ndërkombëtar për të dëshmuar përfshirjen e Serbisë në këto sulme në Kosovën e pavarur?”, ka thënë Tahiri.