Rreshteri policor, Muhamed Lika, u vra mbrëmë në Kaçanik.

Lidhur me rastin ka reaguar Sindikata e Policisë.

Përmes një komunikate për media, kjo sindikatë dënon atentatin kriminal.

Në reagim thuhet se ky akt i rëndë është një atentat i drejtpërdrejtë ndaj sigurisë publike, ligjit dhe vetë shtetit të Kosovës.

“Çdo sulm ndaj një zyrtari policor është sulm ndaj Republikës së Kosovës!”, thuhet në reagimin e Sindikatës së Policisë.

“Policia e Kosovës është shtylla kryesore e rendit dhe sigurisë në vend. Prekja e saj është përpjekje për të minuar themelet e shtetit tonë dhe nuk do të tolerohet. Sindikata e Policisë së Kosovës kërkon nga të gjithë akterët shtetërorë dhe institucionet e drejtësisë veprime të menjëhershme për zbardhjen e këtij akti kriminal dhe vënien para përgjegjësisë të autorëve”.

“Ne qëndrojmë të palëkundur në mbështetje të çdo pjesëtari të Policisë së Kosovës dhe nuk do të lejojmë që këto akte të frikësimit të lëkundin përkushtimin tonë ndaj detyrës dhe Republikës. Nder dhe lavdi për sakrificën e Rreshter Muhamed Lika!”.