Trafikantët shqiptarë, pjesë e një grupi ndërkombëtar të trafikantëve, u jepnin pilula fëmijëve migrantë për të mos bërë zhurmë gjatë kalimit ilegal të kufirit Kroaci-Slloveni, ka njoftuar Policia e Italisë të enjten.
Hetimi pati nisur më 2021, para se Kroacia të hiqte kontrollet kufitare në fillim të këtij viti, me rastin e bashkimit të zonës “Schengen”.
Sipas policisë italiane, migrantët silleshin me vetura deri në kufirin Kroaci-Slloveni, më pas ecnin gjatë natës dhe merreshin me vetura në anën tjetër. Përderisa fëmijëve u jepeshin pilula gjumi, të rriturit furnizoheshin me “shumë” pije energjike për ta bërë udhëtimin.
Në disa raste, kontrabandistët i rrihnin emigrantët që t’i detyronin të ecnin, ka thënë Policia. Migrantët paguanin mes 200 dhe 250 euro për të kaluar kufirin, pjesën kyçe të quajtur si “rruga ballkanike e kontrabandës”.
Policia ka thënë se banda prej 26 personash u shkatërrua falë ndihmës së policisë së Kroacisë dhe Sllovenisë. Shumica e migrantëve që trafikoheshin nuk e kanë pasur Italinë destinacion kryesor. Policia nuk ka treguar se cili ishte destinacioni përfundimtar i migrantëve, por ka thënë se ata kryesisht duan të ikin drejt Evropës veriore.
