Lajme
Shqipëria më afër se kurrë hapjes së negociatave të anëtarësimit në BE
Demokracia
14:50 | 22 Qershor 2022

Share:

Një ditë mund të na ndajë nga drita jeshile për hapjen e negociatave të anëtarësimit të Shqipërisë dhe Maqedonisë së Veriut në Bashkimin Evropian.

Të dy vendet janë shumë pranë vendimit të shumëpritur për aprovimin e kuadrit negociues të Maqedonisë së Veriut nga 27 vende anëtare të Bashkimit Evropian.

Ky kuadër negociues kishte deri tani mbështetjen e 26 shteteve anëtare, por jo të Bullgarisë, e cila e ka mbajtur pezull për shkak të çështjeve bilaterale me Maqedoninë e Veriut kryesisht mbi të drejtat e qytetarëve bullgarë në Maqedoninë e Veriut, si dhe çështjeve të tjera të lidhura me historinë, gjuhën dhe idnetitetin midis dy vendeve. Por së fundmi në Bullgari është arritur një kompromis mbi propozimin francez për kuadrin negociues të Maqedonisë së Veriut me Bullgarinë, cili tashmë pritet të votohet nga forcat politike në parlamentin bullgar këtë mbrëmje. Për Shqipërinë, që prej qershorit 2021 nuk ka asnjë vend anëtar që ka qenë kundër aprovimit të kuadrit negociues me Bashkimin Evropian.

Bashkimi Evropian duket se përgatitet për të anonçuar lajmin e shumëpritur për te dyja vendet dhe Ballkanin Perëndimor. Së paku, të gjithë treguesit flasin në këtë drejtim. Presidentja e Komisionit Evropian, Ursula von der Leyen dhe presidenti i Këshillit Evropian, Charles Michel do të mbajnë një konferencë për shtyp në përfundim të takimit midis 27 liderëve të Bashkimit Evropian dhe 6 liderëve të Ballkanit Perëndimor.

Një konferencë e tillë nuk e kishte parashikuar deri sot pasdite. Së dyti, burimet e Bashkimit Evropian kanë shpjeguar për ABC, se do të ketë konkluzione për Ballkanin Perëndimor.

Dhe së treti, të gjithë liderët e Ballkanit Perëndimor kanë konfirmuar prezencën e tyre në samit, ndërkohë që liderët e Shqipërisë, Serbisë dhe Maqedonisë së Veriut kishin lajmëruar se mund të bojkotonin samitin si shenjë protestë për veton bullgare.

Të gjithë sytë nga parlamenti bullgar

ABC ka drejtuar pyetjen, nëse parlamenti bullgar voton pro propozimit francez në mbrëmje, se ç’do ndodh nesër, nëse do të ketë një deklaratë politike të 27 liderëve evropiane, ku të thuhet në terma të përgjithshëm, se pengesa e fundit për aprovimin e kuadrit negociues Shqipërinë dhe Maqedoninë e Veriut u hoq, gjë që bën të mundur fiksimin e një date për konferencën e parë ndërqeveritare( hapjen e negociatave) me të dyja vendet ?.

Sipas burimeve të Bashkimit Evropian, nëse nisemi nga parimi që do të ketë një shumicë parlamentare në Bullgari në favor të propozimit francez për kuadrin negociues midis Bashkimit Evropian dhe Maqedonisë se Veriut, atëherë sigurisht që do ketë një reagim nga liderët evropianë. Këto burime, i janë përgjigjur pyetjes tjetër të ABC, nëse kuadri negociues me Maqedoninë e Veriut dhe Shqipërinë duhet të formalizohet së pari përmes organit të 27 ambasadorëve të përhershëm të BE-së, COREPER, për të kaluar më pas nga Këshilli i punëve të përgjithshme dhe liderët evropianë ? Sipas këtyre burimeve, aprovimi i kuadrove negociues mund të bëhet edhe përmes një procedure të shkruar. /abcnews.al

Të ngjashme
Lajme • 19 Maj 2024