Xhudistja kosovare, Nora Gjakova ka fituar medaljen e bronztë në Kampionatin Botëror të xhudos që po mbahej në Budapest të Hungarisë.
Gjakova në garë për këtë medalje e “gjunjëzoi” xhudisten nga Serbia, Marica Perishiq, shkruan Demokracia.com.
Kjo ishte medalja e parë botërore e Nora Gjakovës në karrierën e saj.
Faqja zyrtare e Komitetit Olimpik të Kosovës (KOK) ka publikuar në faqen zyrtare videon e momentit kur Nora Gjakova e fiton meçin ndaj xhudistes serbe.
Pas këtij suksesi historik, ka reaguar edhe trajneri i Kosovës në xhudo, Driton Kuka përmes llogarisë së tij në “Facebook”.
“Medalja e Kampionatit Botëror po vjen në Kosovë. Nora Gjakova 57 kg. Për medaljen shkëlqeu kundër garueses nga Serbia, Perishiq. Kosova mbi të gjitha”, ka shkruar Driton Kuka.
28-vjeçarja e nisi ditën duke e mposhtur Julia Kowalczyk, pastaj “viktima” e radhës ishte holandezja Sanne Verhagen si dhe xhudistja ruse Aastasiia.
Në gjysmëfinale, Nora është mposhtur nga Klimkait, e cila është e dyta në ranglistën botërore. /Demokracia.com