Ushtria amerikane njoftoi se kreu sulme ajrore kundër grupeve të lidhura me Iranin në Sirinë lindore, raporton Anadolu Agency (AA).

“Nën drejtimin e Presidentit (Joe) Biden, forcat ushtarake të SHBA-së kryen sulme ajrore precize në Deir ez-Zor, sot në Siri. Këto sulme precize synojnë të mbrojnë dhe sigurojnë forcat amerikane nga sulmet si ato të 15 gushtit kundër personelit amerikan nga grupet e mbështetura nga Irani”, thuhet në deklaratën e Komandës Qendrore të SHBA-së.

“Sulmet e SHBA-së kishin në shënjestër objektet e infrastrukturës të përdorura nga grupet e lidhura me Gardën Revolucionare Islamike të Iranit”, shton deklarata.

Operacioni i SHBA-së kundër grupeve të lidhura me Iranin vjen në kohën kur Bashkimi Evropian ka propozuar një projektmarrëveshje për riaktivizimin e marrëveshjes mbi programin bërthamor të vitit 2015 me Teheranin.

Në deklaratë nuk përmendet nëse ka viktima.