Shtetet e Bashkuara të Amerikës, donatori kryesor i Organizatës Botërore të Shëndetësisë, po i rezistojnë propozimeve për ta bërë agjencinë më të pavarur, thanë katër zyrtarë të përfshirë në bisedime, duke ngritur dyshime për mbështetjen afatgjatë të administratës Biden për këtë agjenci.

Propozimi, i bërë nga grupi i punës i OBSH-së për financimin e qëndrueshëm, do të rriste kontributin vjetor të çdo shteti anëtar, sipas një dokumenti të OBSH-së të publikuar më 4 janar.

Plani është pjesë e një procesi më të gjerë reformash të galvanizuar nga pandemia COVID-19, që ka nxjerrë në pah kufizimet e fuqisë së OBSH-së për të ndërhyrë herët në një krizë. Por qeveria amerikane po e kundërshton reformën sepse ka shqetësime në lidhje me aftësinë e OBSH-së për t’u përballur me kërcënimet e ardhshme, përfshirë nga Kina, thanë zyrtarët amerikanë për Reuters.

Në vend të kësaj, qeveria amerikane po nxit krijimin e një fondi të veçantë, të kontrolluar drejtpërdrejt nga donatorët, që do të financonte parandalimin dhe kontrollin e emergjencave shëndetësore. Katër zyrtarë europianë të përfshirë në bisedime, të cilët nuk pranuan të identifikoheshin, konfirmuan kundërshtinë e SHBA-së, ndërsa qeveria amerikane refuzoi të komentonte.

Propozimi i publikuar kërkon që kontributet e detyrueshme të shteteve anëtare të rriten gradualisht nga viti 2024, në mënyrë që ato të përbëjnë gjysmën e buxhetit bazë prej 2 miliardë dollarësh të agjencisë deri në vitin 2028, krahasuar me më pak se 20% tani, thuhet në dokument, shkruan Scan.

Buxheti kryesor i OBSH-së ka për qëllim luftimin e pandemive dhe forcimin e sistemeve të kujdesit shëndetësor në të gjithë botën. Ai gjithashtu mbledh rreth 1 miliard dollarë shtesë në vit për të trajtuar sfida specifike globale si sëmundjet tropikale dhe gripi.

Mbështetësit thonë se suporti aktual në financimin vullnetar nga shtetet anëtare dhe bamirësi si Fondacioni Bill dhe Melinda Gates e detyron OBSH-në të fokusohet në prioritetet e përcaktuara nga financuesit dhe e bën atë më pak të aftë të kritikojë anëtarët kur gjërat nuk shkojnë siç duhet.

Një panel i pavarur mbi pandemitë që u emërua për të këshilluar mbi reformën e OBSH-së, kishte bërë thirrje për një rritje shumë më të madhe të tarifave të detyrueshme, në 75% të buxhetit bazë, duke e konsideruar sistemin aktual “një rrezik të madh për integritetin dhe pavarësinë” e OBSH-së.