Shtetet e Bashkuara, Bashkimi Europian dhe Britania njoftuan sanksione të reja ndaj Rusisë të martën pas njohjes nga Moska të dy rajoneve separatiste në Ukrainë si entitete të pavarura.

Megjithatë, ndikimi i sanksioneve të reja ka të ngjarë të jetë minimal. Qeveritë perëndimore – tani për tani – po preferojnë të mbajnë në rezervë paketat shumë më të mëdha të sanksioneve që kanë planifikuar nëse kriza përshkallëzohet siç ka ndodhur të enjten me sulmet e nisura në të gjithë Ukrainën nga forcat ruse.

Kjo do të thotë se bankierët rusë ose homologët e tyre perëndimorë me ekspozim ndaj vendit nuk do të humbasin shumë gjumë.

Në të vërtetë, bankat amerikane nuk presin që sanksionet globale të kenë një ndikim të madh në bizneset bankare amerikane ose të ndezin rrezikun e infektimit, duke qenë se huadhënësit kanë pak ekspozim ndaj ekonomisë ruse sipas ekspertëve.

Bankat e mëdha të Rusisë janë thellësisht të integruara në sistemin financiar global, që do të thotë se sanksionet ndaj institucioneve më të mëdha mund të ndihen shumë përtej kufijve të saj. Por sanksionet e reja fokusohen tek huadhënësit më të vegjël.

Masat që synojnë bankat nuk janë ende aq të gjera sa ato të vendosura pas aneksimit të Krimesë nga Rusia në vitin 2014, megjithëse shumë prej atyre sanksioneve mbeten në fuqi.

BE-ja ka thënë se është e gatshme të imponojë “pasoja masive” në ekonominë e Rusisë, por gjithashtu ka paralajmëruar se, duke pasur parasysh lidhjet e ngushta energjetike dhe tregtare të BE-së me Rusinë, ajo dëshiron të rrisë sanksionet në faza.

Cilat banka të huaja kanë më shumë gjasa të ndiejnë goditjen?

Bankat e Eeropës – veçanërisht ato në Austri, Itali dhe Francë – janë më të ekspozuarat në botë ndaj Rusisë dhe kanë qenë në gatishmëri të lartë nëse qeveritë vendosin sanksione të reja.

Bankat italiane dhe franceze secila kishin pretendime të papaguara prej rreth 25 miliardë dollarësh (22 miliardë euro) ndaj Rusisë në tremujorin e tretë të 2021, sipas shifrave të BIS. Bankat austriake kishin 17.5 miliardë dollarë (15.5 miliardë euro). Kjo krahasohet me 14.7 miliardë dollarë (13 miliardë euro) për SHBA.

Ndër huadhënësit më të ekspozuar është RBI e Austrisë, e cila ka operacione të mëdha në Rusi dhe Ukrainë. Ajo ka thënë se “planet e krizës” do të hyjnë në fuqi nëse gjërat përkeqësohen. Aksionet e saj u mbyllën me 7.5 për qind të martën.

Megjithatë, shumë banka të huaja kanë ulur ndjeshëm ekspozimin e tyre ndaj Rusisë që nga viti 2014, duke i bërë disa bankierë më pak të shqetësuar për kërcënimin e sanksioneve./scan-tv.com/