Duke tentuar të jap sqarime lidhur me një artikull të publikuar në Demokracia.com, Komuna e Prishtinës ka zbuluar ‘sekretin’ e madh, se nuk i ka përmbushur kriteret kontraktori i rekomanduar për kontratën “Konsulencë për themelimin e Shërbimit të Arkitektit të Kryeqytetit për nevojat e Komunës së Prishtinës”. Është dëshmuar se kompania e rekomanduar për kontratë ka përdorur referenca për garim në këtë tender të një kompanie tjetër, që nuk ka qenë pjesëmarrëse në tender, shkruan Demokracia.com.
Komuna e Prishtinës në vitin e kaluar ka lidhur kontratë trevjeçare në vlerë prej 12 milionë euro me kompaninë “Shërbimi i Arkitektit të Kryeqytetit” (SHAK) për konsulta dhe shërbime arkitektonike të kryeqytetit.
SHAK është në pronësi të kompanisë së arkitektit Astrit Nixha, “ANARCH” SH.P.K. dhe kompanisë Ardi CC L.L.C.
Më 29.08.2023, kompania “Anarch” shpk dhe “Ardi CC L.L.C” kanë bërë marrëveshje duke formuar një konzorcium të përbashkët për të garuar në tenderin e Komunës së Prishtinës.
Në dosje të tenderit, komuna ka vendosur një kriter ku ka kërkuar që operatori ekonomik të posedojë referenca për punët e kryera në dhjetë vitet e fundit.
Referencat që ka përdorur kompania “Anarch” SHPK nuk janë të saj, por të një kompanie tjetër të cilën gjithashtu e ka në pronësi Astrit Nixha. Bazuar në Ligjin e Prokurimit Publik, referencat duhet të paraqiten vetëm për punët e kryera që janë bërë nga konzorciumi garues dhe të asnjë kompanie tjetër, shkruan Demokracia.com.
Deri sa Komuna e Prishtinës ka kërkuar listën e kontratave dhe referencave për punët e kryera në dhjetë vitet e fundit, kompania “Anarch” shpk është themeluar në vitin 2018. Këtë e ka bërë të ditur vetë Komuna e Prishtinës në një reagim të saj të djeshëm për artikullin e Demokracia.com.
“Më tutje, grupi i operatorëve ekonomik të kontraktuar “Anarch Sh.P.K. & Ardi CC L.L.C.” kanë qenë të regjistruar kohë më parë. “Anarch” Sh.P.K. si anëtar i konsorciumit ekonomik është themeluar 17.10.2018 ndërsa anëtari tjetër i konsorciumit “Ardi CC” Sh.P.K. është themeluar me datë 29.04.2008. Pra, që të dy kompanitë kanë vite përvojë pune dhe nuk janë regjistruar tre muaj para nënshkrimit të kontratës siç pretendohet në shkrimet tendencioze”, thuhet tutje në reagimin e Komunës së Prishtinës.
Duke parë këtë përgjigje të komunës së Përparim Ramës, Demokracia.com fillimisht ka menduar se bëhet fjalë për një kompani trashëgimtare të regjistruar më herët si biznes, të cilës më pas i është bartur e gjithë pronësia.
Demokracia.com ka pyetur sot në Agjencinë e Regjistrimit të Bizneseve të Kosovës (ARBK), nëse kompania “Anarch” shpk është vazhdimësi e ndonjë kompanie tjetër apo është e re?
ARBK-ja ka konfirmuar se bëhet fjalë për kompani të re, të cilës nuk i është ndërruar asnjëherë statuti.
“Në bazë të regjistrit zyrtar të bizneseve shoqëria tregtare “Anarch” sh.p.k, me numrin unik identifikues (NUI) 810166365, është themeluar më 17 tetor 2018. Pronari i këtij biznesi është Astrit Nixha. Ky subjekt është aktiv dhe nuk ka regjistruar asnjë ndryshim që nga data e themelimit”, thuhet në përgjigjen për Demokracia.com të Ministrisë së Industrisë, Ndërmarrësisë dhe Tregtisë, pjesë e të cilës është ARBK-ja.
Zyra e prokurimit e Komunës së Prishtinës, në momentin që e ka poseduar certifikatën e regjistrimit të biznesit “Anarch” SHPK është dashur ta hedh poshtë ofertën e tyre dhe të mos e kualifikojë si operator të përgjegjshëm, me të cilin më pas ka lidhur edhe kontratë.
Në listën e kontratave dhe referencat e ofruara nga OE Anarch SHPK, të cilat nuk janë të përcjella me dokumente valide në ofertë, që të gjitha janë listuar me datat para vitit 2018 dhe asnjëra nuk është e operatorit ‘Anarch SHPK’. Nga ky fakt del se ky operator ka dhënë deklarata dhe të dhëna të rreme. Për më tepër, asnjë referencë pune nuk është në emër të operatorit Ardi CC, prandaj i mungon përvoja, por edhe referencat në emër të operatorëve të tjerë që nuk janë pjesë e konzorciumit janë të pavlefshme dhe nuk mund të tjetërsohen dhe as të përdoren në procedurë prokurimi.
Referencat që i ka paraqitur kompania janë të shkruara vetëm në emër të “Anarch”. Një kompani tjetër me këtë emër të regjistruar në vitin 2004 në ARBK e ka gjithashtu në pronësi Astrit Nixha. Bëhet fjalë për kompaninë N.P. “Anarch”, e cila figuron aktive në ARBK, por më të nuk ka qenë Nixha në garë.
Ditë më parë u faktua lidhja mes komisionit vlerësues me operatorin Anarch SHPK dhe pronarin e saj, Astrit Nixha. Dhe për këtë ekziston dyshimi se komisioni i vlerësimit, përkundër që ka pasur njohuri se referencat janë jo valide dhe në kundërshtim me ligjin dhe DT, ata me vetëdije i kanë pranuar dhe vlerësuar me pikë maksimale në ofertën teknike për t’i mundësuar këtij operatori marrjen e kontratës. Për më tepër, asnjëra referencë dhe listë e kontratave nuk ka mbështetje me prova, siç kërkohet me ligj dhe DT, që punët janë kryer me sukses, llojin e shërbimit dhe kontratën, vlerën e kontratës apo ndonjë dokument valid që e vërteton deklaratën, por është një vetëdeklarim i operatorit që del të jetë i rremë.
Demokracia.com ka gjetur se fillimisht komuna e kishte shënuar në dosje të tenderit dhe në njoftimin për kontratë kërkesën me listën e kontratave dhe referencat në tri vitet e fundit, ashtu siç edhe e njeh LPP-ja, por më pas kanë bërë korrigjim dhe këtë e kanë zgjatur në dhjetë vitet e fundit. Kjo krijon dyshime se është bërë vetëm që t’i përshtatet ofertës ashtu edhe fiktive të Nixhës, pasi që nëse shihen referencat, ai nuk e ka pasur asnjë të realizuar në tri vitet e fundit.
Më poshtë mund të shihni listën e kontratave me data para vitit 2018, përkatësisht para themelimit të kompanisë. Po ashtu, shumica e referencave janë jovalide, sepse bëhet fjalë për disa punë që nuk janë kryera akoma dhe sipas ligjit është kërkuar për punët e kryera. /Demokracia.com – Mentor Buzhala/
Janë edhe disa referenca tjera, të cilat nuk kanë numër të kontratës, nuk kanë datë, as shumë të kontratës, etj.
