Inspektorati Policor i Kosovës sërish ka arrestuar sot zyrtarin policor i cili në një video-incizim sulmonte 18 vjeçarin.

Ai sot u arrestua me dyshimin se i njëjti ka kryer veprën penale “pengim i procedurës zyrtare” dhe të njëjtit i është caktuar masa e ndalimit për 48 orë.

Sipas IPK-së, kanë vazhduar të ndërmarrin veprime hetimore lidhur me informacionin (vide-incizim i një ngjarje të vitit 2018) në bazë të të cilit dyshohej për tejkalim të autorizimeve policore gjatë përdorimit të forcës nga një zyrtar policor në Prishtinë, përcjell Demokracia.com

Lidhur me këtë rast, IPK kishte arrestuar një zyrtar policor më 28 .01 2021 me dyshimin se i njëjti ka kryer veprën penale “keqtrajtim gjatë ushtrimit të detyrës zyrtare”, kurse i njëjti rast nga prokuroria është vendosur që të vazhdohet në procedurë të rregullt.

“Në kuadër të këtij hetimi, Inspektorati Policor i Kosovës ka rekomanduar suspendimin edhe të dy punonjësve policorë (një rreshteri policor që në kohën e incidentit të vitit 2018 ishte mbikëqyrës i të dyshuarit dhe një zyrtar tjetër policor që dyshohet se ishte pjesëmarrës në keqtrajtim).Veprimet e mëtutjeshme hetimore lidhur me këtë rast për të sqaruar rrethanat e këtij incidenti do të vazhdojnë nga hetuesit e IPK-së në konsultim të vazhdueshëm me prokurorin përgjegjës”, thuhet në komunikatë./Demokracia.com