Senatori amerikan, Lindsey Graham, njoftoi të mërkurën se 72 senatorë të SHBA-së mbështesin një projektligj që parashikon sanksione të ashpra kundër Rusisë, si dhe tarifa të larta për shtetet që blejnë naftë dhe gaz rus, në rast se presidenti rus, Vladimir Putin refuzon të angazhohet në negociata serioze për të përfunduar luftën në Ukrainë.

“Qëllimi ynë është të mbështesim presidentin”, tha Graham, senatori republikan nga Karolina e Jugut dhe një aleat i ngushtë i presidentit amerikan, Donald Trump.

Ky projektligj përfshin një tarifë 500 për qind për importet e naftës, gazit natyror, produkteve të naftës dhe uraniumit nga Rusia, si dhe ndalon qytetarët amerikanë të blejnë letra me vlerë ruse.

Projektligji ka kaluar tashmë pragun e kërkuar të 60 bashkësponsorëve dhe ka mbështetje nga liderët e të dy partive, duke siguruar një mundësi të madhe për kalimin e tij në Senat dhe për të marrë mbështetje të mjaftueshme në rast të një vetoje të mundshme nga presidenti Trump, shkruan thehill.

“Ai e ka shprehur zemërimin e tij. Ne duam që negociatat të përfundojnë luftën, në një mënyrë të drejtë dhe të ndershme. Mendoj se Trumpi është personi i duhur për të arritur këtë qëllim, por këto sanksione shprehin qëndrimin e Senatit, që e konsideron Rusinë si fajtorin kryesor,” theksoi Graham.

Ai gjithashtu paralajmëroi Putinin të mos e nënvlerësojë Trumpin, duke e quajtur projektligjin “një mjet të rëndësishëm në kutinë e mjeteve të presidentit Trump”.

“Kur presidenti Trump vendos se kemi arritur një moment të papërshtatshëm, prisni veprime”, shtoi Graham.

Sipas tij, Putin do të përballet me një mundësi të thjeshtë: të negociojë ose të shohë si shkatërrohet ekonomia ruse.